adminINHLANGANISO yomdlalo wethenisi koBulawayo ibambene lezakhamizi lezikolo, isinqume ukuvuselela umdlalo wethenisi ngemva kokunanzelela ukuwa kwesimo senkundla zalumdlalo.
Abazali labaqeqetshi babonisane indlela yokuthi baphakamise ithenisi ngoba lawo ungumdlalo olodumo umhlaba wonke.
Ukukhonona ngesimo salumdlalo kuze kulandela ukuthi idolobho lakoBulawayo aliselabo abadlali abakhethwa ukuyamela isizwe kumidlalo yaphezulu.
Kuminyaka elitshumi edluleyo akulamdlali odabuka koBulawayo owakhethwa kuthimu yesizwe.
Phezu kwalokhu, inkundla lazo sezidilika ngenxa yokungasetshenziswa.
Ekhuluma loMthunywa kuliviki uZeb Mawisire oyisikhulu senhlanganiso ebambe ithenisi koBulawayo uthe umlandu wokuvuselela ithenisi ukubazali abalabantwana abangabadlali.
“Nxa sizimisele ukuthi siphendukise ithenisi kumele abaqeqetshi labazali baphakame, kube lokubambana. Banengi abadlali abalesiphiwo sokudlala ithenisi koBulawayo. Uhlupho yikuthi abalasekelo.
“Abazali bengasebenzelana lathi kuzakuba lula ukuthi sincedisane lomdlalo wethu ubuyele esimeni sawo,” kutsho uMawisire ongumzali wabadlali bodumo uFadzai lo Vimbai.
UMichael Msimanga ongumzali uthe: “Okwenza ithenisi iqhube nzima yikuthi ngumdlalo odulayo. Loba ngilabantwana ababili kulumdlalo akulula ukuthi ngibangenise emncintiswaneni bonke. Labanye abazali labaqeqetshi babhekane lodubo olufanayo.
“Inyathelo lokuthi abazali, ababalisi labaqeqetshi baphathisane lizatshintsha umdlalo lo, abantwana bakoBulawayo labo babonakale.”
KoBulawayo abadlali abakhona, abathembisayo yilabo abasacathula kodwa bezingcitshi abaleminyaka yokuzalwa esuka kwelitshumi kusiya ku-18.
Emalokitshini kulenkundla ezingasetshenziswayo ezakhiwa yikhansili ezibalisa lezo ezisesikolo seMthombowesizwe Primary, eTshabalala, Emakhandeni laseSizinda.
Omunye umqeqetshi uAdam Joelson ubike ukuba kusenhlweni zabo ukuthi abadlali bakoBulawayo bayencintisa lengcitshi ezivela kumazwe abalisa iBotswana leZambia.
“Kuyathabisa ukuthi labazali sebebona ukuba kumele siphakamise ezemidlalo koBulawayo. Lonyaka sifuna ukuthi abadlali bethu baye kwamanye amazwe ukuze bathole ulwazi.
Kusenjalo, abadlali bethenisi edlalelwa etafuleni labaqeqetshi balumdlalo kubikwa bazangena kuzifundo zokujulisisa ulwazi lobungcitshi babo kulimpelaviki koBulawayo.
Izifundo lezi ziqoqwe yiBulawayo Table Tennis Association ihlangene lenhlanganiso yeZimbabwe Table Tennis Union.
Kumbiko othunyelwe leliphephandaba, kuthiwa izifundo lezi zikhangelelwe ukuthi ziphakamise abadlali labaqeqetshi abasezikolo zonke ezikontuthu.
UProsper Jaya umqondisi wethenisi yetafula koBulawayo ubike ukuthi uhlelo lwabo selufike kuzigaba ezinengi izwe lonke. Inhlanganiso yabo isifundise abadlali labaqeqetshi abatsha kundawo ezibalisa iMutare, iHwange, iNorton leHarare.
Uthe kuzifundo lezi bakhangelele ukwengeza ulwazi lokufundisa ngendlela okumele abadlali batshaye ngayo ibhola.
“Ukuqoqa izifundo kungelinye lamacebo ethu okuvuselela umdlalo izwe lonke jikelele. Sizafundisa ngokugcweleyo mayelana ngokutshaya ibhola okubizwa ngokuthi ngama-basic and intermediate strokes.”
“Singathaba njalo kungabangcono ukuthi kuzifundo lezi kubuye ababalisi labantwana besikolo.”
Online Reporter