adminARSENAL inovimba kuti Laurent Koscielny achange apora svondo rino kuti azotambe mumutambo wavo neSunderland. Chizvarwa chekuFrance ichi chakakuvara mumutambo weArsenal neNorwich svondo radarika uyo wakapera uri mangange 1-1 chakatsiviwa naGabriel. Asi zvinonzi haana kukuvara zvakanyanya uye maGunners anovimba kuti Koscienly achange ave kuita gadziriro dzake pakupera kwesvondo rino kuti azotambe mutambo weSunderland.
Alexis Sanchez naSanti Cazorla vakakuvarawo zvakare mumutambo uyu uyo wakatambirwa kuCarrow Road asi vachiri kumboongororwa nemachiremba eArsenal. Mutambi wekumashure, Kieran Gibbs, akapotsa mitambo miviri yeArsenal yadarika nekuda kwegumbo rake range akakuvara, asi ari kutarisirwa kunge apora svondo rino uye anogona kunge ari muchikwata chichasangana neSunderland.
Mutambi wekumberi, Theo Walcott, anotarisirwa kupedza nguva refu asingatambe. Haasati ambotamba kubvira paakakuvara musi wa27 Gumiguru apo Arsenal yakakundwa 3-0 neSheffield mumutambo weCapital One Cup. Ave kutarisirwa kutanga kuita gadziriro dzake zvekuti panguva yeKisimusi achange achitamba nhabvu. — Sky Sports News
Online Reporter