admin
Thokozile Mbedzi
ZISELE zibethwa ngumoya izakhamizi zeGokwe kulandela ukubotshwa kwezigebenga eziyisithupha ebesezihluphile ngokutshontsha izifuyo, ukubamba inkunzi, ukubulala abantu kanye lokubhidliza impahla.
Amadoda la abalisa uBernard Honye (35), Brian Mapani (21), Johnson Makorekanwa (35), Aleck Mushayabasa (54), Chrispen Makorekanwa (24) lo Benevolet Chigaya (32) kubikwa abesehluphile ngamacala okutshontsha, ukuhlasela kunye lokubulala kusukela ngenyanga kaNhlangula kuze kufike khathesi andubana abotshwe kuyonale iviki.
Ekhuluma lentatheli kaMthunywa uHlengiwe Maseko uthe sebebethwa ngumoya ngenxa yokuthi abantu akade sebebadlisa luklubhu baze babotshwa.
“Izigebenga lezi besezihluphile lapha, bezitshontsha izifuyo kukanti bezisithi nxa zihlasela abantu bezibatshiya belimele nanko phela kulababili abalokhu belalisiwe esibhedlela.
“Izigebenga lezi zihlukuluze abantu kakhulu lapha ezigabeni ezehlukeneyo eGokwe. Bezihlasela abantu zihlome ngamabhemba, amahloka, amarekeni lemikhonto.
“Abantu abanengi batshontshelwa omakhalekhukwini, imali, ukudla kunye lempahla,” kuchasisa uMaseko.
Isikhulumi samapholisa elizweni uAssistant Commissioner Paul Nyathi ebuzwa ngodaba lolu uthe solufikile ehofisini yabo njalo babonga ukusebenzelana lozulu.
“Njengamapholisa sibonga ubudlelwano obuhle lozulu okwenze ukusebenzisana kwabalula yikho senelisile ukubopha izephula mthetho lezi,” kuphetha uAsst Comm Nyathi.
Online Reporter