admin
ASIKHO isidingo sokutshintsha abadlali kuqembu leBulawayo Chiefs njengoba kusiza umdlalo omkhulu odibanisa lona leDynamos ngoMgqibelo.
Le yindlela ebonwa ngabalandeli labathandi bakanobhutshuzwayo asebebukele iBulawayo Chiefs kumidlalo edluleyo. Umdlalo lo ngoweligi yeCastle Lager njalo uzabe usenkundleni yeBarbourfields.
Amakhosi Amahle angena kulumdlalo engelavalo nanko ayazi ukuba adibana leqembu elingahlangani kakuhle. IDynamos isanda kunqotshwa yiChicken Inn nge 1-0 egumeni layo. Iqembu lakoBulawayo alisoke lifune ukudanisa abalandeli balo ngokukhulelwa yiDembare.
Umqeqetshi weBulawayo Chiefs uNilton Terreso usenikeze abadlali bakhe ithuba lokuthi bazibonakalise. Loba edaniswe yindlela abaqhube ngayo bedlala le-Tenax ngeviki edluleyo, uTerreso ubona umdlalo wabo leDynamos ulula.
Umqeqetshi lo uzathemba abadlali ababalisa uIan Nekati, Elvis Moyo, Kelvin Madzongwe, Sipho Ndlovu, Obriel Chirinda loPerfect Chikwende.
UTerreso waphumela sobala ngokuthi amaphutha abadlali bakhe akumelanga enziwe kuliviki.
“Kudlule ngomdlalo lo. Sesikhangelele okuzayo kuDynamos kodwa silungiselele ukunqoba.”
UCornelius Banda ongumlandeli weBulawayo Chiefs uthe ukungadlali kuhle kweDynamos kuyindaba esegudwini, okuyikhona okufaka iChiefs phezulu.
UBanda akaboni kungumqondo omuhle ukutshintsha unozinti.
“Asikho isidingo sokutshintsha iqembu Ngilokukholwa ukuthi abadlali ebesibakhethile kulimidlalo emibili edluleyo baqondile.
Asidlaliseni bona,” kutsho umlandeli weChiefs lo.
Uthe loba kunjalo, umqeqetshi kuzamele aqaphele ukuthi alungisise abadlali basemuva.
“Umehluko nje okhona njalo osegcekeni yikuthi iBulawayo Chiefs ngokomdlalo ingaphezulu kuleDynamos okwamanje,” kutsho uBanda.
Kusenjalo, iligi yeCastle Lager ingena kuviki lesithupha kulimpelaviki.
IHighlanders ingena indlela isiyadibana leTenax kumdlalo okumele iwunqobe loba sekutheni. IChicken Inn inxuse iZPC Kariba enkundleni yeLuveve ngeSonto.
IBulawayo City isemangweni iya kuHerentals.
Imidlalo yeCastle Lager kuliviki:
NgoMgqibelo: Herentals v Bulawayo City (National Sports Stadium),
Yadah v Manica Diamonds (Baobab),
FC Platinum v Harare City (Mandava),
Bulawayo Chiefs v Dynamos (Barboyurfields)
NgeSonto:
Caps United v Whawha (National Sports Stadium),
Craneborne Bullets v Black Rhinos (Baobab),
Tenax v Highlanders (Sakubva),
Triangle v Ngezi Platinum (Gibbo),
Chicken Inn v ZPC Kariba ( Luveve)
Online Reporter