Online Reporter
Ukukhulumisana kuyinto enhle empilweni yikho nje okhokho baze bathi umlomo litshoba lokuziphungela. Kuveza ukuba umlomo yisikhali sokuzivikela kunye lokuchasisa nxa kulokungazwani. Ngaleso sizatho kuhle ukuba sihlale sikhumbuzana ngobubi bokulwa okubangelwa yikungazwisisani enkulumeni.
Abantu kuyadingeka ukuthi bangafuqwa lulaka kodwa benelise ukuzithoba loba bezonde kanganani.
Ukwehluleka ukukhuza ulaka yikho okucina kubangela ukulwa, kwezinye izikhathi kucine kulezidumbu phansi.
Kukanengi sisizwa ukuthi uZibani ufile besilwa ebhawa kumbe ngenxa yothando sebulawe ngowangakwakhe. Abanengi basuka begijimele ukulwa nxa bethola omkabo bejola.
Yebo kubuhlungu sibili ukweyiswa kodwa lokho akutsho ukuba ukulwa kuzenza ungaseyiswa. Kwesinye isikhathi umuntu wenza ukuganga ngoba vele kuyabe kusegazini lakhe kukanti kwesinye isikhathi wenza lokho ngoba omunye wakhe uyabe engamphathi kuhle kumbe esilela kwezinye izindawo.
Maviki onke kulendaba eziphuma kuphephandaba lethu zabantu abaxabana kungabe kusemabhawa kumbe kwezinye izindawo zokuzithokozisa kucine kusiba lomunye olahlekelwa yimpilo yakhe.
Lokhu akwenzakali kuphela ematshwaleni kodwa laphakathi kwabathetheneyo.
Asazi kumbe umuntu usuka akhulelwe lulaka esithi uyakhuluma. Endulo umnini muzi ubelemvumo yokukhuza imuli yakhe nxa iphambanisa loba nje isintu sisithi induku ayiwakhi umuzi kodwa okhokho bebeyisebenzisa nxa bekhuza.
Loba kuthiwa yikukhuza bakwethu sungaze utshaye umuntu umbulale. Uthi abakibo bazakuzwa njani?
Khathesi sesiphila kwesinye isikhathi, nanko udlakela emakhaya solungenza ucine usuphakathi esitokisini. Nxa ubona kukwehlula ukukhuza ngomlomo kuhle ukuba lehlukane omunye aqonde kweyakhe indawo.
Mthwakazi asizameni ukulungisa okonakeleyo ngendlela eqondileyo hatshi ngodlame, susiya emaphethelweni mhlawumbe umhlaba, imicimbi yokubambana lokuzwana isimilutshwala sokusanda imingcwabo yalabo abafa kuliwa.
Njengabantu abacabangayo futhi abalamandla okukhetha kuhle ukuthi ngazo zonke izikhathi nxa abantu bangaphambanisana sikhethe ukuthula empilweni kulokulwa. Yikho nje kuthiwa koniwa ngomlomo kubuye kulungisiswe ngawo. Kuhle ukuba sikhethe ukukhulumisana kulokulo.
Iyaqhubeka impilo mahlabezulu, asizameni ukuphila ngendlela elobuntu njalo sikhuzane njengabantu abakhulileyo hatshi ukulwa njengezinja eziyabe zisekela edabulileyo.
