Online Reporter
Nkosilathi Sibanda
KUMDLALO wesibili weligi yeCastle Lager ngempelaviki edluleyo kubatshazwe ithalenta lomdlali weHighlanders uMongameli “Smaller” Tshuma, otshiye abadlali labalandeli beDynamos bengelankani.
Umdlali lo, oleminyaka engu-24, udabuka elokitshini elidala koBulawayo, eMinyela, eNumber 1. Ngokubukela indlela adlale ngayo, abantu abahlala kuleli ilokitshi sebemphethe emlonyeni, bekhuluma okuhle kodwa.
Inengi libona uTshuma engumdlali ozasukumisa iHighlanders kulisizini njalo uselinganiswa lowake wadla ubhedu, uJohannes “Tshisa” Ngodzo.
Kuzalindwa imidlalo elandelayo ukuqinisekisa umbono lo, nanko isizini yeCastle Lager Premiership isaqalisa.
Kodwa, okwenziwe ngumdlali lo enkundleni yeRufaro ngeSonto akusoze kulibaleke kalula.
Ubonise ukuzimisela okukhulu, wanikeza abasekeli beBosso ithemba lokuthi lonyaka kuzakuba ngcono.
Lanxa engakafiki esigabeni sabadlali abadumileyo, ibhola alihlohlileyo limphakamisile.
Abalandeli beHighlanders abakhulume leZimpapers Sports Hub bathe uTshuma uzabakhumbuza izikhathi zakudala lapho abadlali ababetshengisa ithalenta lomdlalo othokozisayo enkundleni.
Omunye umlandeli webhola ohlala eHarare, uThabo Moyo uthe: “Ibhola elahlohlwa nguSmaller beliyisimanga. Ungumdlali olekusasa elihle. Lokhu kusikhumbuza sonke ibhola esasilibukela kuPremiership kudala. Kaqhubeke esenza kuhle umfana.”
UZinhle Ncube ohlala eMinyela, laye owayengomuye walabo abangena umango beqonde eRufaro, uthe bamfisela okuhle uTshuma.
“UMongameli Tshuma uveze ukuthi ulithemba leHighlanders. Ibhola alitshaye ngeSonto lingumsebenzi wobuciko. Sibanengi lapha eNumber 1 esilandela iBosso esikholelwa ukuthi angaba ngomunye wabadlali abaphambili eZimbabwe lonyaka.”
UJames Dube, osekela iHighlanders esedolobheni leHwange uthe: “Sibukele umdlalo wakhe kumabonakude, savuma ukuthi silomdlali lonyaka. Uyazi ukudlala njalo ulesibindi sokuthatha izinqumo ezinkulu enkundleni.”
Umbono lo wengezwe nguMthuli Sibanda othe umdlalo kaTshuma uyathokozisa.
“Abafana abanjengoTshuma kumele baphakanyiswe ngoba ithalenta abalalo kalitholakali lula. Ngambukela lumfana esadlala kumaqembu aphansi. Wayekhanya ukuthi uzafinyelela inkundla eziphezulu.
Abalandeli laba bathe bazalinda ngabomvu imidlalo ezayo yeHighlanders, belethemba lokuthi uTshuma uzaphinda ababonise ithalenta lakhe.
Kusenjalo, umqeqetshi weHighlanders uBenjani Mwaruwari uthe bazakwenza konke okusemandleni abo ukuthi bancedise uTshuma, bamqoqe abengumdlali ozakuya khatshana emdlalweni.
“UMongameli uyisibonelo sokusebenza nzima lokuzimisela. Siyaqhubeka simfundisa ukuze abe ngumdlali ongcono kakhulu. Nxa eqhubeka ngalindlela, angaba ngumdlali okhanya kakhulu kuPremiership, athole amathuba lakwamanye amazwe.”
Ingcitshi zomdlalo zibike kumakhasi ebulenjini kuliviki ukuba uTshuma ulethalenta elingaphezu kokujwayelekileyo.
