Kulomdlalo eBarbourfields. . . Highlanders v Triangle

Highlanders’ Marvin Sibanda prepares to take a penalty, towards the end of the game, which he missed during a Premiership match against Scottland at Rufaro Stadium yesterday. (Picture: Lee Maidza)

Nkosilathi Sibanda
UTRY Ncube uyazi ukuthi engehluleka ukunqoba lamuhla, uzaphenduka isitha kubalandeli beHighlanders, abakade bacina ukweqa ngenjabulo.

Ngehola lesithathu emini abalandeli laba bazabe bethe gwaqa enkundleni yeBarbourfields belande umdlalo weqembu labo leTriangle, kuCastle Lager Premiership.
Lo ngumdlalo okhangelwe ngamehlo abomvu, abalandeli beBosso bekhangelele ukuthi bephume bebobotheka ngokunqoba kweqembu. Lokhe lumqeqetshi wabamba intambo, kusuka uKelvin Kaindu, abalandeli kabakatholi injabulo epheleleyo.

Abalandeli beHighlanders abakhulume lentatheli ngoLwesine ekuseni, bathe uNcube kumele afukule icebo lokunqoba.
Abanye babalandeli bathe bazathi ukuvala amabhizimusi abo, bayebukela iqembu abalithanda kakhulu.

“Asifuni ukuhambela ize. Kumele sinqobe,” kutsho uPhilani “Pitso” Moyo, ohlala eMatshobana.
“Kubuhlungu ukuthi sibe siphethe sibanjwa ngamaqembu amancane. Kazame ukwenza ngcono uTry Ncube.”

UConerlius Gambiza, ongomunye wabalandeli uthe: “Ngithengisa emkambo edolobheni kodwa lamuhla ngizatshayisa masinyane. Ngehola lesibili emini ngizabe ngiseBarbourfields. Ngiyifisela inhlanhla iBosso yami.”

ITriangle ingena kulumdlalo ingazange inqotshwe kumidlalo emihlanu edluleyo, lapho enqobe kabili, yaqeda ngokulingana kathathu.
Zombili, kusigaba sakuqala sesizini, zaqeda zingutshiki lobhanqa la 1-1 eGibbo Stadium.

Eminye imidlalo yeCastle Lager Premiership ekhona ngoLwesine emini:
Dynamos v Manica Diamonds (Rufaro), Highlanders v Triangle (Barbourfields), Bikita Minerals v Scottland (Gibbo)