admin
Wayne Ncube
INKAMPANI yeAgrovet ebona ngezokunakekela izifuyo isixwayise abalimi ukuba bafuye izimvu ngoba kulula ukuzifuya njalo zilebhizimusi elihle.
Ekhuluma lentatheli kaMthunywa uMnumzana Patrick Nyathi onguLivestock Specialist ubike ukuba abalimi kumele babe lolwazi ngokufuya izimvu ukuze bangaphambanisi ibhizimusi yabo ngokwenza okungayisikho.
“Nxa ufuna ukufuya izimvu zakho eziphile kuhle bana lesiqiniseko sokuthi zithola ukudla okufaneleyo njalo okwakha umzimba okuzenza zihlale zilamandla.
“Nxa ungapha izimvu zakho indumba ze-soya beans lomumbu ziyakhula kuhle. Kumele zidle emadlelweni aqondileyo ngoba nxa kungenjalo kulula ukuthi zibanjwe yimikhuhlane,” kulandisa uMnu Nyathi.
Amanzi aqakathekile kumpilakahle yezimvu njalo kumele zithole amanzi ahlanzekileyo ngoba amanzi angcolileyo azenza zihlaselwe yimikhuhlane.
Ekhuluma ngokuvikela izimvu kumikhuhlane uthe ukuvikela kungcono kulokwelapha ngakho abalimi kumele benze isiqiniseko sokuthi bayavikela izimvu zabo emikhuhlaneni.
“Lokhu kungenziwa ngokubiza abeVeterinary Services ukuba bazokuhlolela izimvu zakho ngemva kwesikhathi njalo bakucebise ngemithi okumele uhlale ulayo ukuze izimvu zakho zihlale ziphephile,” kutsho uMnu Nyathi.
Uphethe ngokuthi ukugela izimvu zomhlobo ole-wool ukuze zihlale zihlanzekile kuyancedisa ukuzivikela kumikhuhlane.
“Izimvu ezile-wool kumele zigelwe ngazo zonke izikhathi ngoba nxa zingekelwa zikhula zicina zisiba lezibungu ezingabangela imikhuhlane, njalo kuyabambela ingcekeza engazenza zingahlaliseki kuhle kwezinye izikhathi kucine kuphambanisa lobuhle benyama yazo lapho sezisiyathengiswa,” kuphetha uMnu Nyathi.
Online Reporter