Online Reporter
Nkosilathi Sibanda
OWAKHETHWA ukuthi ahlole ngokusetshenziswa kwemali evela kuWicknell Chivayo kuqembu leHighlanders, uJabulani Nkomo, uthe uyamukela lumsebenzi ngezandla zombili.
UNkomo wakhethwa ngusomabhizimusi uChivayo ngoNhlangula. UChivayo wabika ukuba uzanika iHighlanders iUS$1 million, ezasetshenziswa kunhlelo zeqembu.
UNkomo wethule umbiko wokwamukela umlandu lo.
“Ngimele iHighlanders lelizwe jikelele, ngithanda ukwethula ukubonga kwami okuqotho. Isipho lesi sikhulu, ngaloba yisiphi isilinganiso njalo kutshengisa uthando olujulileyo luka-Sir Wicknell kuHighlanders lakwezemidlalo jikelele.’ Njengoba umphakathi usazi, wabika ngesipho se-US$1 million, echaza njalo ukuthi imali le izathunyelwa ingama-US$250 000 phakathi kwesikhathi kulumnyaka.”
Uthe sekube lemihlangano embalwa lequla labakhokheli beHighlanders, kuhlelwa ukuthi kube lokuzwanana ngendlela imali le ezasetshenziswa ngayo, kulandela izifiso zikaChivayo.
“Inhloso yethu yikuthi kube lempumelelo, hatshi lonyaka kuphela kodwa lakusasa.
USir Wicknell ku-Facebook, waveza izifiso zakhe ngokuthi imali isetshenziswe njani njalo okumqoka kukho konke yimpilakahle yabadlali. Wagcizelela ngokuqakatheka kokuthi iHighlanders ikhokhelwe kakuhle. Yiwo umsebenzi engiwuphiweyo. Akufihlwa ukuba iHighlanders iyasadalala, isiyehluleke ukuthwala inkezo yeligi okweminyaka efika elitshumi lambili. Lokhu kudabula inhliziyo zabalandeli. Liqiniso elibuhlungu leli nxa sikhangele ukuthi iqembu lifikise iminyaka elikhulu ngomnyaka ozayo
“Kuyikwethemba kwami loChivayo ukuthi isipho lesi sizakhuthaza abadlali enkundleni, okuyikhona okuphinda kunikeze intshukuntshu eqenjini lonke kusukela kuzisebenzi, amalunga eqembu, labalandeli uqobo,” kutsho uNkomo.
Ubike ukuba useke wahlangana labadlali, wabatshela ukuthi bazaphathiswa kukho konke abakufunayo.
“Injongo yami ngeyokuthi kube lokuzethemba lokuthi bakholwe ukuthi uChivayo uzagcwalisa isithembiso sakhe. Ngiyathaba njalo ukwazisa ukuthi i-US$250 000 yokuqala isithunyeziwe njalo iku-trust account. Ngithanda ukwazisa abantu bonke ukuthi kangilawo amandla wokusayina. Okwami kuphelela ekunikezeni imilayezo njengokuvumelana lequla leHighlanders executive.
“Kumhlangano wamhlaka 26 Nhlangula, kwavunyelwana ukuba kuqalwe ngokubhadalwa imali zabadlali, ama-winning bonus ka2024 lo2025, iUS$57 000.
