Online Reporter
Ethel Ncube
INGCITSHI kwezokufuya inkomo seziveze ukuthi kuqakathekile ukugcina ama-DNA enkomo zonke ezisesibayeni ngoba lokhu kuyanceda nxa usuzithengisa.
UMnumzana Obert Chinamo oyi-Pedigree breeder uthe umlimi ofuye inkomo kubalulekile ukuthi abe le-DNA yenkomo zakhe zonke njalo lokhu kugcizelelwa lakuZimbabwe Herd Book.
Uthe umuntu nxa ethenga inkomo kumele azi ukuthi umthengisela uphi umhlobo wenkomo ngokunjalo i-DNA yayo iyancedisa ukuthi kuvele sobala ukuba yiwo ngempela lowomhlobo wenkomo.
Ekhuluma lentatheli uMnu Chinamo ubike ukuba inkomo zonke abalazo bayabhala phansi ngazo ngokugcweleyo.
“Ukwenza i-DNA kuqakathekile ngoba nxa usenza i-profile yayo kumele ufake konke nje okunanzelelayo ngayo.
“Mina njengomfuyi wama-Simmental, zikhathi zonke kungaba lenkomo ezeleyo ngiyahamba eNational University of Science and Technology (Nust) ukuyayenza i-DNA ukuze ngazi ukuthi akulankuzi efohleleyo, impumela yiyo engitshelayo ngibe sengihambisa eZimbabwe Herd Book (ZHB) ukuze bakufake kuhlobo lwenkomo engizifuyayo,” kubika uMnu Chinamo.
Uqhubekele phambili eveza ukuba ukwenza ama-DNA kuyaphathisa nxa suthengisa inkomo zakho.
“Nxa suthengisa inkomo zakho umuntu othengayo uzafuna ukwazi ukuthi umhlobo awuthengayo ngempela yiwo uqobo lwayo, kuyamele abone impumela yama-DNA ikanti futhi engahamba eZHB bayafika bakhangele ku-profile yakhona bamtshengise ngempela ukuthi nxa ethenge i-Simmental yiyo ngempela,” kubika uMnu Chinamo.
