Online Reporter
YiNtatheli kaMthunywa
INKUNDLA yezinduna zomdabu kuleli iNational Chiefs Council ibika ukukhulunyiswana lokulalelwa kwabahlukunyezwa ngesikhathi seGukurahundi kuzaqala mhlaka 26 Nhlangula ezigabeni zeMatabeleland North laseMatabeleland South.
Ibike lokuthi uhlelo lolu luzaphathwa ngendlela ezaqakathekisa labo abahlukunyezwayo, obunye ubufakazi buphawulwe ngemfihlo kuvikelwa ukuthi bungaphumi emphakathini, ikakhulu lobo obuthinta abantu ngendlela ebuhlungu.
Ingxoxo lezi zizakhokhelwa zinduna zomdabu kuzabelo lezi, kulandela ukuvunyelwana kuNational Chiefs Council ngemva komhlangano wabakhokheli owenziwe ngoMgqibelo odluleyo. Phambili kwalumhlangano, induna beziqhuba umkhankaso wokwazisa uzulu ezigabeni ngokuzakwenzakala kunkulumo zeGukurahundi.
Umgcinisihlalo weNational Chiefs Council, induna uFortune Charumbira ubike ukuba sebeleminyaka emine belungiselela uhlelo lolu oselwavunyelwa, lwasekelwa nguMongameli welizwe u-Emmerson Mnangagwa.
“Lolu uhlelo lwamukelwa nguMongameli uMnangagwa uqobo, owathatha isinqumo sokuvula indaba yeGukurahundi, ukuze kuvunyelwe ukuthi abantu — kungaba ngabathintekileyo, imuli, kumbe amaqula— ukufaka izikhalazo zabo enduneni,” kutsho induna uCharumbira.
“Uhlelo luzagxila kwabahlukunyezwayo. Lokho kumele kwaziwe zintatheli. Akusinkulumo zomphakathi ngenxa yokuba sithunuka amanxeba ezinye zazo ngokunjalo lezondaba kumele ziphathwe njengemfihlo, akuvumi ukuthi zabikelwe umphakathi.”
Uphinde wachaza ngokucacileyo ngokubaluleka kokuba indaba lezo ziphathwe njengemfihlo esithi: “Kasivumeleni kuphela abahlukulunyezwayo, amalunga omdeni baphume kumifanekiso lamavidiyo. Lokho kuqakathekile.
Abahlukunyezwayo akumelanga bahlangane ndawo inye. Bonke bazathola isikhathi sabo. Induna zizahlela izikhathi ezifaneleyo kwabahlukunuezwayo.
Induna uCharumbira uthe kunkulumo lezi induna inye ngayinye izabe isekelwa liqula lengcitshi ezilamalunga angu-13.
“Iqula leli lizagoqela abantu abazingcitshi ekukhulumeni labantu.
Ephendula ngenkinga mayelana lalabo abathintekileyo abangabe besemazweni, induna uCharumbira uthe izikhalazo kufanele zenziwe ngokuqondileyo eZimbabwe.
“Kubalulekile ukuthi nxa ulodaba, woza uzokhuluma lenduna. Kodwa, induna zethu ngeke ziyehlala zilalela indaba eBotswana kumbe eSouth Africa. Abantu bazavunyelwa isikhathi sokwenza amalungiselelo ukuze bazefaka izikhalazo zabo.”
