admin
Ncekwenhle Ncube
BAYADELA abazali abalabafundi esikolo seTsholotsho High nanko phela umphathisikolo lekhomiti ebona ngempumelelo esikolo lesi baphezulu kwecebo lokuthi abafundi baqeqetshiswe ngemisebenzi yezandla.
Kubikwa lelicebo lize lomphathisikolo obuye abengumlisa esigabeni ngemva kokunanzelela ukuthi kulentsha enengi ethi ingaqeda isikolo ihlale phansi iswele okokuziphilisa ngenxa kokuswelakala kwemisebenzi elizweni.
Lo umbono wawusengela kwezinye inkokheli lazo zawamukela ngoba kubukeka kulicebo elihle.
Ekhuluma lentathelizindaba uMphathisikolo uMnumzana Sicelo Dube uthe bakhangelele ukuthi kusiyaphela umnyaka izifundo zezandla zibe sezilempande esikolo sakhe.
“Njengesikolo sikhangelele ukuthi nxa umnyaka uphela izifundo zemisebenzi yezandla zibe sezilempande esikolo sethu.
“Ngikhuluma nje sesivule iphulojekithi yokufuya inkukhu zamaqanda lezokudla. Ulwazi abafundi abaluthola lapha luzabaphathisa kakhulu nxa sebephumele phandle. Abanye babo bazazithola sebephila ngakho ukufuya inkukhu zonalezi.
“Kunengi okukumacebo ethu njengesikolo. Isimo somkhonomi sinzima kodwa senza konke okusemandleni ethu ukunika abafundi laba ulwazi olungabasiza kusasa. Abanye abafundi bazathola ulwazi lokwakha, ukweluka amacansi kanye lokubaza,” kulandisa uMnu Dube.
Kuzwakele ukuthi imisebenzi le yezandla ikhanya iyasiza kakhulu abanye abafundi abangaphiwanga esikolo. Kuba lithuba elihle lokuthi baqale ukulolongwa iziphiwo zabo njengoba amathole ekhethwa kusakhanya.
Kubikwa ukuvulwa kwe-irrigation lakho kuyinhloso yokukhaliphisa abafundi abafisa ukuba ngabalimi kusasa.
Bayaqeqetshiswa indlela ezitshiyeneyo zokulima lokuvikela izilimo zabo emikhuhlaneni etshiyeneyo.
Umphathi uphethe ngokunxusa izakhamizi kanye laye wonke umuntu ozizwa elomlandu ukuthi engenelisa ukuphathisa ngalokho alakho okungaba yimali noma yini ukuze babambisane ekwakheni isizwe ngokufundisa abantwana abayikusasa yesizwe lesi.
Online Reporter