admin
Ethel Ncube
KULESALUKAZI seGuwe eNkayi esitshiye izakhamizi zakule indawo zizidla izibindi ngemva kokuveza ukuthi silelifa lokhomane esalutshiyelwa ngukhokho waso ukuze siphaphe ngalo nxa sisiyakhunkula, uMthunywa ukuzwile lokhu.
Lanxa kuvamile ukuthi abantu bakhulume ukuthi abathakathi baphapha ngokhomane ebusuku izakhamizi zesiqintini esingaphansi kukaSobhuku uGrandman Mpofu zilokhu zinathisana itiye ngendaba kaSelina Dlamini oleminyaka yokuzalwa engu-77 okhulume ngowakhe umlomo ukuthi ulokhomane oluyimpahla yelifa alutshiyelwa ngukhokho wakhe.
UDlamini kubikwa uveze njalo ukuthi “indizamtshina” (ukhomane) yakhe yamahala le ubeyigada labangane bakhe abalitshumi lanye ebusuku besiya endaweni ezitshiyeneyo ezifana leGoli kanye leMalawi.
Kuzwakale ukuba ukhomane lolu lanxa beseluludala beluhlala emkulwini kaDlamini njalo yena labanye bakhe bebesenelisa ukungena phakathi kwalo bayefika endaweni ezikhatshana ezifana laseMzansi Afrika leMalawi ngobusuku bavuke bekhona ekuseni.
UMthunywa esizwa ngaloludaba kazange aphozise amaseko kodwa uhle wabhekisa amabombo khonale eGuwe ukuze ayezizwela ngalindaba.
Esinye isakhamuzi esale ukuqanjwa igama laso sisesabela impilo yaso kodwa esithande ukwaziwa ngokuthi nguMaMoyo siveze ukuthi uDlamini kazange ayale ukuthi ukhomane lolu ngolwakhe.
“UDlamini wakubeka sobala ukuthi ukhomane ngolwakhe njalo uyalugada. Waphinda waveza ukuthi lilifa alitshiyelwayo ukuthi alusebenzise lanxa kungelamuntu obesazi ngalo.
“Mina nginje lokhu ngingakukholwa ukuthi umama lo ngomunye wabantu akade behlupha lapha ngoba besingamcabangeli ukuthi ulento enjalo,” kuchaza uMaMoyo.
Intatheli ixoxisane lomnikazi “wendizamtshina” le uDlamini yena ovumileyo ukuthi ukhomane ulalo njalo seluludala.
“Mina kwathiwa ngilokhomane luhlala emkulwini ngilalo sibili kodwa lami ngalutshiyelwa ngokhokho bami.
Owafawafa bathe ngilugada ebusuku ngisiyaloya ngithathwa ngokhokho behambe lami kodwa lokho mina bengingakwazi ngikuzwe ngabo.
“Ukhomane lolu baluthatha bayalutshisa ngoba kuthiwa ngikhunkula ngalo ebusuku,” kulandisa uDlamini.
Izakhamizi ezikhulume loMthunywa ziveze ukuthi okwazenza zayabiza amaZiyoni la yikuthi bezithwele nzima ngokufelwa okungazwisisekiyo kanye lokuwelwa ngamashwa ehlukeneyo.
Intatheli ikhulumisane loBethule Ndlovu yena ochaze ukuba sebazahlala kuhle baphumule ukulala besetshenziswa ebusuku.
“Abafana laba abathandazayo basincedile kakhulu nanko phela impahla akade isetshenziswa ukuganga isikhitshiwe njalo labanikazi balahliswa,” kuphetha uNkkz Ndlovu.
Online Reporter