admin
Ungababona ngezikhathi zamaKhisimusi bebuya becwebezela, betshayela imota ezidula okwamagama ngitsho phela ezingumhlobo we-GD 6, lona okuluhlobo olubizayo lwemota ngitsho labangqamngqotshe bamankampani bathwala nzima ukuthi bazithenge, wena ungaba nguthathekile uthi kutsho basebenza emawofisini okubetha khona umoya oqandayo uzogwetshelwa udilikajele, uswele lomuntu ozakuvakatshela ezokubona ngoba izihlobo zegazi zikhatshana.
Ngikhumbula omunye umngane wami engizambiza ngelokuthi nguXolile noma kungasilo gama lakhe lamaqini, wasuka wathatheka, wayangena wafunda impilo yemigulukudu eyayiphila ngokugqekeza amabhanga, bangaxhunywa ngamapholisa babaleke bazecatsha kweleZimbabwe, besidla leyomali yokutshontshwa.
Ngathi ngimbuza ukuthi usebenza msebenzi bani, ngoba ngangikwazi mhlophe ukuthi esikolo wasibalekela esesezingeni eliphansi, ngahle ngabona ngokutomatoma ukuthi umbuzo wokuthi usebenza msebenzi bani uyawuvika njalo uyamcaphula ngahle ngayifunda ivaliwe, ye bakhona abathi noma bengafundanga okuyangaphi abe lenhlanhla limvume iGoli athole umsebenzi ozakhuphula ngitsho sibi somdeni.
Unina wayethi nxa esegwabisela amanye amanina emhlanganweni lesibholaneni uzwe ethi owakhe umntwana uyazi into ayisebenzelayo, uyise laye ethi nxa esebuxhaphile uzwe ehleka amanye amakhehla ethi bona bagugiselwa amabhulugwe yena egugiselwa imota engeke yathengwa ngutitshala weZimbabwe, ngoba wayetshiyelwe iFord Ranger engazi ukuthi yimota eyayidingwa eGoli.
Akuphelanga nsuku ngaki wafika umbiko wokuthi uXolile udutshuliwe eGoli ngamapholisa etshontsha ebhanga.
Yikho ngithi kini hambani liyedinga umsebenzi lingafiki libe yizikliwi, izigebenga ngoba lingcolisa ibizo elihle labantu beZimbabwe abaziwa ngemfundo, inhlonipho lokusebenza kanzima, ngoba izenzo ezimbi zobugebenga yikho liyalibone kwesinye isikhathi abantu baseSouth Africa bezonda betshisa abantu ngamavili, befuna ukuthi babuyele kibo.
Lathi bazali asizameni ngamandla wonke ukwazi ukuthi abantwabethu basebenza kuphi kwendawo ungayengwa yikuhlangabeza amatshangani bag ungazi lapho avela khona, kwelinye ilanga uyohlangabeza sokuyisidumbu.
Ayixabene.
Online Reporter