Online Reporter
Raymond Jaravaza
IZAKHIWO ezintathu ezisenzikini yendawo yamabhizimusi koBulawayo zilumathe umlilo ngoLwesibili emini.
Akula abalimele kakhulu loba behanjiswe esibhedlela kodwa izakhiwo ezintathu ezisemgwaqweni kaLobengula Street ku-3rd lo 4th Avenue zitshile.
Izimota eziyisithupha zokucitsha umlilo zisetshenziswe kumzamo wokulwisa ukumemetheka komlilo ukuthi ungaqhubeki usabalala kwezinye izakhiwo eziseduzane.
Umlilo lo utshise ingxenye yesitolo esidumileyo, esakoSai Mart, isitolo sabosomabhizimusi baseChina esithengisa impahla ezehlukeneyo lebhutsha. Imisebenzi yamabhizimusi ime okwesikhatshana nanko labantu besebegcwele eceleni komgwaqo kaLobengula Street bebukela izicitshamlilo zizama ukucitsha umlilo lo.
Umphathi omkhulu weBulawayo Fire Brigade, uMnumzana Mhlangano Moyo, uthe akukatholakali imbangela yomlilo lo.
UMnu Moyo usole izakhamizi ngokuphuza ukubika nxa kungaqhamuka umlilo nanko ziqala zizame ukucitsha umlilo zingabona umemetheka sezibika. Uthe isikhathi esichithwayo senza kube lomonakalo omkhulu.
