Online Reporter
Danisa Masuku
UBHISHOPU webandla leDamasko Zion Christian Church eBeitbridge ugwetshwe iminyaka elitshumi esejele ngemva kokutholakala elecala lokubulala owesifazane ngesikhathi esithi umkhipha amadimoni.
Umfundisi lo, uGomori, umiswe phambili kweHigh Court koBulawayo ngoMvulo lapho agwetshwe khona nguMahluli uNgoni Nduna.
Kuvele ukuthi umuyi lomyeni wakhe babotshwa ngamaketane, bakhululwa izigqoko batshaywa kabuhlungu ngemvubu ngenjongo yokubakhipha amadimoni.
Ekwethuleni isigwebo, uMahluli uNduna uthe ukuzivikela kukaGomori ngokutshaya amalunga ebandla kwakuyindlela yokuxotsha amadimoni akwamukeleki emthethweni.
“Ukuzivikela kwakhe ngokuthi lokhu kwakuyisiko lebandla lokutshaya amakholwa ukuze kuxotshwe amadimoni, lokuthi umuyi lomyeni wakhe bavuma ukwenza lokhu ngesikhathi bengena ibandla, akutsho lutho emthethweni. Leli lisiko lakudala njalo elingekho emthethweni,” kutsho uMahluli uNduna.
Umqondisi omkhulu wezokutshutshisa, uMnumzana Justin Uladi, ucele umthethwandaba ukuthi unike umsolwa isigwebo esilukhuni ukuze kube yisixwayiso kwabanye abakhokheli bamabandla abasaqhuba imikhuba enjalo.
“Impilo yomuntu yalahleka kungelamsebenzi ngenxa yomkhuba wakudala ongelabuntu. Isigwebo sejele yiso esifaneleyo,” kutsho uMnu Uladi.
Uthe umuyi waphathwa ngendlela elihlazo ngoba wakhunyulwa izigqoko watshaywa kabuhlungu phambili kwamadoda ayengamalunga ebandla.
“Umthethwandaba kumele uthumele umlayezo ocacileyo wokuthi imikhuba enjalo engelabuntu kayamukeleki.”
Umyeni kamuyi utshele inkundla ukuthi ngesikhathi bethandaza, omunye umfundisi webandla, uPhilip Banga, wabamisa.
“UBanga watshela amadoda amabili ebandla ukuthi asibophe ngamaketane esithi singenwe ngamadimoni. Ngelanga elalandelayo sahanjiswa emfuleni uLimpopo lapho esacwiliswa khona emanzini besithi baxotsha amadimoni,” kutsho indoda le.
Uqhubeke wathi ngemva kwalokho babuyiselwa esontweni lapho abafakwa khona kwelinye ikamelo.
“Sesifike lapho, uGomori waqalisa ukusitshaya. Umkami wacina esefile ngenxa yokutshaywa lokho.”
