derick.khumalo
Kuwe umuthi omkhulu endimeni kaqeda isizungu ikakhulukazi kuthelevishini kutshona umlingisi uSeputla Sebegodi (63).
Abanengi bazomkhumbula elingisa kuGenerations enguKenneth Mashaba owayetshade lonkosikazi owayemncane uDeneo.
Umdeni kaSeputla usuqinisekile ukuthi lolu qweqwe lomlingisi alusekho emhlabeni lutshone ngoLwesithathu.
“Singumndeni kaSeputla siyakuqinisekisa ngokukhulu ukudabuka ukudlula emhlabeni kukaSeputla. Utshona nje ubelenkinga yezifo ezihlobene letshukela,”
“Umdeni ucela ukuthi uhlonitshwe njengoba usazilile futhi usafuna ukubhekana lalesi sikhathi esinzima,” kutsho isitatimende.
Muva nje ubekuScandal, kanti udlale indima enkulu kumidlalo yakuthelevishini okuhlanganisa iSurbuban Bliss, Bophelo ke Semphego, Redemption leminye eminingi.
Ubengagcini nje kuthelevishini njengoba lakumidlalo yasesteji ubelegama.
Phakathi kwayo kuhlanganisa iBig Dada, Waiting for Godot, The Rivonia Trial, Once a Pirate, Mooi Street Moves ukukha nje phezulu.
Utshona nje usanda kuba sematheni kuvela isithombe sakhe ezinkundleni zokuxhumana kucaca ukuthi usedla imbuya ngothi.
Waphumela obala watsho ukuthi leso sithombe sithathwe kwenye ifilimu eyayishuthwa akusona isimo sakhe sempilo njengoba evela esithombeni.
Kukhangelelwe ukuthi labo asebeke basebenza laye bazwakalise amazwi enduduzo kwazise lezi zindaba zisezintsha.
– Ubulembu
