Online Reporter
Nkosilathi Sibanda
KU-HIGHLANDERS kukhethwa abadlali abatshengisela ukuthi bazimisele ukudlalela ukunqoba maviki wonke njalo bayancintisana ukuthola indawo kuyo yonke imidlalo.
Lokhu kuvezwe ngosabambe isikhundla somqeqetshi uTry Ncube, ngesikhathi ekhuluma lentatheli, phambili komdlalo wabo leGreenfuel, oweCastle Lager Premiership, ozabe ungeSonto eBarbourfields.
Umqeqetshi lo uthe bayazi ukuthi baphakathi kwenkinga ngokwehluleka ukunqoba. UNcube lokhe wangena esikhundleni esikhulu, usephathe imidlalo emithathu. Usephume waba ngutshiki lobhanqa kabili, wanqotshwa kanye.
Laye uyakuzwa ukutshiselwa esihlalweni.
“Yebo, sisenkingeni. Silomthwalo onzima emahlombe, kumele sinqobe,” kutsho uNcube.
“Abadlali bayazi lokhu. Bonke bancintisela ukukhethwa eqenjini elizadlala. Kuhle lokhu njalo kubaluleke kakhulu ukudlalela ibheji yeqembu.”
Kusenjalo, umdlali weHighlanders uMafios Chihweta kubikwa usahlolwa ngodokotela kulandela ukulimala.
“UChihweta uphendukile ekulolongeni leqembu, sikhangelele ukuba laye ngeSonto. UNigel Muvuti lo-Archford Faira kabazange balolonge ngenxa yokulimala.”
Imidlalo yeCastle Lager Premiership kulimpelaviki:
NgoMgqibelo: Herentals v Simba Bhora (Rufaro), TelOne v Dynamos ( Ascot), ZPC Kariba v Manica Diamonds ( Nyamhunga), FC Platinum v Chicken Inn (Mandava), Yadah Stars v MWOS (Heart), Bikita Minerals v Kwekwe (Gibbo), Ngezi Platinum Stars v Scottland ( Baobab)
NgeSonto: Highlanders v Greenfuel (Barbourfields), CAPS United v Triangle (Rufaro)
