Online Reporter
Ethel Ncube
AKUBIZWA ozwayo ngeviki ezayo koMabhikwa eJotsholo mhlaka 14 Mbimbitho lapho okuzabe kusethulwa khona induna yesifazane.
Ukwethulwa kwalinduna kuza kulandela ukwedlula emhlabeni kwenduna uVusumuzi Khumalo njalo induna le ibekwa ukuze ibe ibambele umntwana ozagcotshwa ukuba yinduna angakhula.
Intatheli ixhumane lonkosazana Sibonginkosi Sithole ongumama wenduna ezakwethulwa ebantwini.
“UPrincess Zanele Khumalo uzakwethulwa ebantwini ngeviki ezayo njalo uzabe ebambele umntakamuyi, uVusumuzi Khumalo. UZanele ngudadewabo wenduna eyedlulayo emhlabeni. Umntwana ozagcotshwa, okwakhathesi usesemncane kakafikisi iminyaka engu-18 usaseleminyaka engu-9 okutsho ukuthi nxa esekhulile ubabakazi wakhe uzadedela yena angene agcotshwe. Esithanda ukuba uzulu akuzwisise yikuthi uZanele Khumalo akagcotshwa kodwa uyethulwa ukuba uzabe ebambele uKhumalo omncane aze akhule,” kubika uNkszn Sithole.
Ubuye waveza ukuba banxusa uzulu ukuba abuye koMabhikwa ngosuku kusethulwa induna.
“Amalungiselelo ahamba kahle kakhulu silinde ukuba ilanga lifike sethule uMaKhumalo ebantwini azasebenza labo kanye lezakhamizi. Siyalinxusa lonke ukuba libuye eJotsholo koMabhikwa sizothakazelela ilanga elikhulu kangaka elokwethulwa kwenduna engumama.
“Wonke umuntu uyanxuswa, akukhathalekile ukuba usuka ngaphi, lonke sithi buyani lizokwamukela umama, uNduna uMabhikwa,”
