admin
Daphne Machiri
VANA vepachikoro cheMabvuku High, muHarare, vanotarisirwa kubatsirika mudzidzo yavo zvichitevera kuparurwa kwakaitwa kamuri yekuverengera (library) pachikoro ichi nguva pfupi yadarika. Muhururkuro nemukuru wechikoro, VaJosiah Mbirimi, vanoti vakaona zvakakosha kuti vana vawane imba yekuverengera zvinova zvinovandudza pfungwa pamwe nedzidzo yavo.
“Takaona kuti vana vazhinji vari kunetseka munyaya dzekuverenga. Vana ngavafarire kuverenga mabhuku zvinova zvinovabatsira kunyangwe vave kuita zvidzidzo zvavo kuyunivhesiti,” vanodaro VaMbirimi.
“Vana vechikoro vazhinji vanotoda rubatsiro mazuva ano kuti vave nepfungwa dzakajeka. Tinoda kudzosa kukosheswa kwetsika yekuverenga iyo yaiveko kare.”
Vachitaurawo pachiitiko ichi, VaTonderai Magaya vesangano reDandare Arts Development Trust, iro riri kubatsira nekupa mabhuku muzvikoro, vanoti zvakakosha kuti vana vawane mabhuku ekuverenga.
“Takaona zvakakosha kuti isu sesangano tibatsire zvikoro zviri munharaunda dzatigere munyaya yekusimudzira kuverengwa kwemabhuku.
“Zvakare tichange tichiita zvikwata (clubs) zvinoreva izvo kuti tichaisa vana mumapoka umo tichavadzidzisa nekuvapa mazano ekuzvichengetedza nekuti vakwanise kuziva zvidzidzo zvavanoda kuzoita kana vave kuenda kumayunivhesiti,” vanodaro VaMagaya.
Vanotizve nekufamba kwenguva, vanoda kuzotanga chirongwa cheEducational Cultural Exchange icho vana vemuno vanoenda kune dzimwe nyika vachinodzidza tsika nemagariro eko.
“Vana vechikoro vanofanirwa kufambawo kune dzimwe nyika vachiona kukosha kwekuverenga mabhuku pamwe nekudzidzawo pamusoro petsika nemagariro emamwe marudzi. Tichaita kuti vana vazive kuti bhuku ndiyo shamwari inovaka,” vanodaro.
Online Reporter