Online Reporter
Nkosilathi Sibanda
UKUNQOBA kumidlalo edluleyo sekuphakamise idlabuzane kubadlali beHighlanders, nanko lomqeqetshi uPieter De Jongh ubika ngokuba lethemba lokuthi bazanqoba kumidlalo ezayo.
Umqeqetshi, ngesikhathi ekhuluma lentatheli ngoLwesine ekuseni, uthe kuyamjabulisa ukuthi abadlali bakhululekile njalo bawulinde ngabomvu umdlalo wabo weligi leFC Platinum, ozabe usenkundleni yeMandava ngempelaviki.
Uthe kawuthathi kancane lumdlalo ngoba iFC Platinum uyiqathanisa lamaqembu aphezulu, alosekelo lwemali ngakho akumelanga idelelwe.
“Sesinqobe kumdlalo owodwa kuligi, sadlala ngokulingana kanye, saphinda sanqoba kumdlalo wenkezo yeChibuku Super. Impumela le isilethe ukuzethemba ledlabuzane eqenjini,” kutsho lumqeqetshi.
Ekhuluma ngamalungiselelo omdlalo leFC Platinum uthe:
“Sifuna ukunqoba, liqiniso lelo. IFC Platinum ifana leScottland. Ngamaqembu alebhajethi enkulu, alemali enengi labadlali abaphezulu. Kodwa, thina sikusimo esihle.”
Umqeqetshi weBosso lo wake wayikhuza iFC Platinum ngo2023 lapho athwala khona inkezo yeCastle Challenge.
Imidlalo yeCastle Lager Premiership ngempelaviki:
TelOne v MWOS (Ascot), Chicken Inn v Kwekwe United (Luveve), Manica Diamonds v Grenfuel (Sakubva), Simba Bhora v Scottland (Wadzanayi), Herentals v caps United (Rufaro), ZPC Kariba v Ngezi Platinum Stars (Nyamhunga), FC Platinum v Highlanders (Mandava), Yadah FC V Bikita Minerals (Heart Stadium)
