admin
LENZA izimanga kumgido wesintu kanye lomculo iqembu labomama elidume ngokuthi nguMchilo wamakhosikazi Carnival elidabuka eLupane esigabeni seMqoqi nanko phela kukhanya lonyaka yilo elizakhokhela kumkhosi wePupu Shangane Dance.
Iqembu leli kubikwa lisebenza ukukhokhela ikakhulu emikhosini yembukiso yamasiko esintu kanye lokujabulisa abantu libuye njalo lifundise ngezamasiko kanye langokugida.
UMqondisi waleliqembu uGogo uThembi Ngwabi uveze njalo ukuthi iqembu leli likhangelele ukukhokhela njalo umkhosi wePupu Shangane Dance ozakuba khona lonyaka.
“Njengeqembu elidume ngokukhokhela emikhosini yezamasiko lonyaka sikhangelele ukukhokhela umkhosi wePupu Shangane Carnival ngoMpalakazi lapho okuzabe kugidwa khona ezesintu kuphela. Lapha sizabe sijonge ukuthuthukisa amasiko lokukhumbula impilo kanye lenhlalo yesizwe sikaMthwakazi.
“Ekuthuthukiseni amasiko lapha sikhangelele njalo ukuthuthukisa indimi zethu ngoba sinanzelele ukuthi indimi zakoMthwakazi kungathi ziyatshabalala yikho sibone kungcono ukuthi sikhuthaze ngokuthuthukiswa kwazo.
Lapha-ke siyabe sikhuthaza ukuthi abantu bakoMthwakazi bazigqaje ngendimi zabo bengaze badela indimi zabo,” kutsho uGogo uMaNgwabe.
UMthunywa ukhulumisane loMarketing Public Relations Manager uThembelihle Mhlanga ochaze ukuthi iqembu leli lilomnyaka lasungulwa.
“Iqembu leli salisungula ngo2015 siyizakhamizi zeMqoqi ngemva kokunanzelela ukuthi amasiko ethu ayatshabalala. Iqembu lethu liqukethe ontanga, abadala kanye lamakhehla lezalukazi ngenhloso yokufundisa abatsha amasiko,” kutsho uMhlanga.
UMhlanga uqhubekele phambili njalo walandisa ukuba iqembu leli landise ukukhokhela emikhosini etshiyeneyo kanye lokujabulisa abantu.
“Iqembu leli landise ukukhokhela emikhosini etshiyeneyo yikho nje kumnyaka ophelileyo liphatheke kuHarare International Carnival. Kunyanga ephelileyo besilomkhosi wokuqeqetsha kwezemigido yesintu eLupane.
“Okunye njalo siyafundisa amaqembu atshiyeneyo ngemigido yesintu kanye lengoma zesintu. Imigido esiyigidayo igoqela imihlobo yonke yesitshikitsha, imigido yamaZulu kanye leminye imigido yabeNguni. Imigido le siyigida ngesizatho sokuthi sidabuka kwaZulu yikho nje sigida yonke imigido yabeNguni,” kutsho uMhlanga.
Online Reporter