adminNkosilathi Sibanda
KUMPELAVIKI edluleyo iligi entsha kumdlalo we-basketball eye-Southern Region Basketball League ehlanganisa amaqembu akoBulawayo laseNkabazwe isunguliwe enkundleni zeBulawayo Centre for the Disabled (BCD).
UJoe Mujuru ongunobhala jikelele weBulawayo Volleyball Association ubike ukuba iligi entsha le izaqhubekela phambili idlalwa ngempelaviki enkundleni zeGweru lakoBulawayo.
Ubike ukuba ukuhlanganiswa kwamaligi amadolobho womabili sekwengeze amathimu kanye lesisindo somncintiswano.
Injongo yokubumba iligi entsha ngeyokuthi kubelula ukuthola usekelo kulumdlalo osuthwele nzima ngokuswela imali yokuqhuba imincintiswano yaphezulu.
“Siqale imidlalo yethu njenge-Southern Region ngoMgqibelo enkundleni zeBCD koBulawayo. Besingathanda ukuthi iBulawayo idlale yodwa lokuthi amaqembu eGweru atshikilisane wodwa kodwa bekuzakuba nzima njengeminyaka yonke ukuthola usekelo lwemali.”
Kusenjalo, ku-volleyball yakoBulawayo, enkundleni yeRoss Camp, iqembu leUFB emdlalweni walo wokuqala linqobe iRailstars 3-0.
Lisuke lapho laya nqoba ngokufanayo ithimu yeMidlands State University leyeZPC.
Ithimu yeRailstars igcwele abadlali abancinyane abangakatholi isikhathi eside besenkundleni. Abadlali laba loba betshengisele ithalenta banqotshwe kumahlandla amathathu omdlalo 25-8, 25-18 le 25-18.
Komunye umdlalo wamadoda iqembu le-The Great Churchill lehluleke ukudlala kakuhle ngemva kokunqotshwa 3-1 liqembu labafundi be-Midlands State.
Kulumdlalo abafundi banqotshwe kuhlandla lakuqala 23-25 anduba baphenduke ngokuhlohla 25-23, 25-15, 25-15.
Kumantombazana bekungelula njalo. Odade beMSU babone izibunu zenyoka ngokunqotshwa ngamapholisa eZRP Raiders lethimu yeHighlanders.
Kumdlalo wakuqala iRaiders idlale ngokutshelela 25-16, 25-10 and 25-8 kwathi iHighlanders iphosele 29-27, 25-10, 25-18.
Online Reporter