admin
SHANGWITI yemujaho wemarathon iri kusimukira, Elijah Mabhunu, ndiye akahwina mubairo mukuru svondo radarika pamujaho weTanganda 21km half- marathon wakamhanyirwa kwaMutare.
Mabhunu akasiya dzimwe shasha dzaisvika 300 pamujaho uyu uyo waakapedza neawa rimwe nemaminitsi matanhatu.
Uyu wange uri mujaho waMabhunu wechipiri waahwina gore rino zvichitevera kuhwina kwaakaita weVictoria Falls Marathon masvondo adarika uye aka ndeke chipiri achikwikwidza muTanganda half- marathon. Gore radarika, akamhanya mumujaho we10km akahwina menduru yesirivha.
Muhurukuro naMabhunu akati: “Ndiri kufara zvikuru ndazozviita gore rino.
“Gore rekutanga ndakamhanya mu10km ndikaita nhamba yechipiri asi gore rino ndakazvipira kuti ndoda kumhanya 21km iyi yandazohwina. Nguva yadarika, ndakahwina kuVictoria Falls saka apa ndaizviziva kuti ndinozviita uye ndiri kufara kuti ndahwina.
“Iye zvino ndave kugadzirira kuenda kuAngola uko ndichanokwikwidza kumutambo weOne Man Marathon, ndinoda kunoihwina zvekare,” akadaro Mabhunu.
Pamujaho wemadzimai, shasha yemarathon ine mukurumbira – Constance Nyasango – ndiye akahwina menduru yegoridhe mumujaho uyu achisiya dzimwe nyanzvi dzakaita saSharon Tavengwa.
Aka ndeke chitatu Nyasongo achiedza raki mumujaho uyu sezvo akakwikwida kaviri achitora nhamba yechitatu.
Mune mimwe mijaho yakamhanyiwa, Elford Moyo ndiye akahwina mumakwikwi ewiricheya achiteverwa naSamson Muroyiwa.
Kuvanhukadzi, Magrate Bangajena ndiye akaita zvinorova akatora mubairo uyu achiteverwa naMagadaline Madzivire.
Mumujaho we10km, shasha iri kusimukira zvekare mukumhanya marathon, Jacob Magomere, ndiye akahwinha menduru yegoridhe.
Online Reporter