Online Reporter
Abel Ndooka
CHIKWATA chenziyo dzechitendero chine mukurumbira cheMabvazuva Choral Group hachisi kudzokera shure murwendo rwekutendeutsa vanhu zvichitevera kubura kwachakaita dambarefu idzva rechipfumbamwe rinonzi ‘Mibvunzo Yenhando’.
Dambarefu idzva iri rine nziyo shanu dzinoti ‘Chichemo Changu’ ako vakaimba naTrymore Bande, ‘Vadzivisi’, ‘Ndichazviramba’, ‘Zvamafunga Kunamata’ na‘Mibvunzo Yenhando’.
Rinotevera dambarefu rechisere rinonzi ‘Ndasunungurwa’ iro rakaburwa gore radarika.
Mutungamiriri wechikwata ichi – Darlington Shungu Chizondo – anoti vari kurwira kutendeutsa vanhu kuti vazive kukosha kwekunamata Mwari.
“Rwendo rwatafamba sechikwata rwunofadza uye isu tinonzwa kufara zvikuru kuti Mwari vari kuramba vachitipa simba rekuti tirambe tichishumira vhangeri rake zuva nezuva, naizvozvo tinoramba tichingovarumbidza.
“Hazvinei nekuti ichechi ipi yaunopinda, enda ikoko unorumbidza Mwari, uchaona zvishamiso zvaachaita muhupenyu hwako,” anodaro Chizondo.
Mumwe wechikwata cheMabvazuva Choral Group – Trymore Nyandiro – anokurudzira vamwe vaimbi kuti vakoshese kutsikisa mhanzi inopa dzidziso kune veruzhinji uye kuvadzoreredza kuti vagoziva hukuru hwaMwari.
“Ini ndinoda kupa kurudziro kune vamwe vaimbi kuti mhanzi yatinobika ngaive inoshandura hupenyu hwevanhu. Ngatitsikise mhanzi inopa dzidziso kune veruzhinji vagoziva hunhu hwakanaka uye mararamiro akakosha muhupenyu.
“Isu sechikwata tiri kuzama kuti mhanzi yedu ive inovaka vanhu uye ive inodzororedza vanhu vagoziva kukosha kwekunamata Mwari. Matambudziko ose atinosangana nawo anopedzwa naMwari chete, hunge tikamunamata nekutenda maari tichirevesa,” anodaro Nyandiro.
Mabvazuva Choral Group inozivikanwa nedzimwe nziyo dzinosanganisira ‘Zvifananidzo’ ako vakaimba naObert Chari, ‘Zororo Kudenga’ na‘Baba Vanozvigona’.
