admin
ZVICHITEVERA kutanga mwaka mutsva wePremier League vachipisa semoto, mutambi weLeicester City — Riyad Mahrez — ari kudiwa nezvikwata zvakawanda apo pachatanga kutengeswa vatambi muna Ndira.
Chizvarwa chekuAlgeria ichi pamwe chete naJamie Vardy, vabatsira Leicester kuti ive pamusoro pelog reEPL uye mwaka wavo uri kunakidza zvikuru.
Achitaura neTelefoot, Mahrez akaramba kutaura zvakanyanya pamusoro penyaya yekuti anogona kubva kuKing Power Stadium odzokera kunotambira nhabvu yake kuFrance.
“Pandaitambira muLigue 2 ndaida chaizvo kuramba ndichitambira nhabvu ikoko uye ndaishuvira kuzotambira nhabvu muLigue 2.
“Asi iye zvino handifunge kuti ndichadzokera kuFrance. Handifunge kuti ndichaenda ini.
“Pane tunyaya-nyaya turi kubuda, asi ini zvangu ndinofara zvikuru kuno kuLeicester, kunyanya iko zvino apo tiri kutungamira tiri pamusoro pelog,” akadaro.
Mahrez akatamba nhabvu inonwisa mvura svondo radarika apo chikwata chaClaudio Ranieri chakaramba chichitamba nhabvu inodakadza zvikuru pachakakunda cheEverton 3-2. Mutambi uyu akanwisa kaviri kubva pabhora remugadzikirwa (pena), izvo zvakabva zvamuona achikwikwirira pakunwisa muEPL, parizvino anwisa ka13 muPremier League uye mumitambo mitatu yadarika anwisa katanhatu.
Leicester ndiyo iri kutungamira iri pamusoro pelog, svondo rino ichasangana nechikwata chaJurgen Klopp cheLiverpool icho chisiri kutamba zvakanaka parizvino pazuva reBoxing Day uye yozosangana neManchester City musi wa2 Ndira. — Daily MailOnline
Online Reporter