admin
SHASHA yemutambo wekarate, Sensei Tawanda Mufundisi, anoti ari kutarisira kuti kutanga kwegore ra2016 ange ave kukwikwidza mumakwikwi akasiyana zvichitevera kupedza kwaakaita gore rose agara achirapwa gumbo rake.
Sensei Mufundisi akatyoka gumbo mugore ra2014 apo akakava mutambi wekuUkraine uyo waairwa naye musemi-fainari yemutambo weIKO Kyokushinkaikan Matsushima Group World Karate Tournament waitambirwa kuSouth Africa.
Mumutambo uyu, Sensei Mufundisi akazohwina menduru yebhuronzi sezvo akazokundikana kufambira mberi kuenda kufainari atyoka gumbo.
Sensei Mufundisi mumwe wevatambi vane mukurumbira muZimbabwe uye ane mbiri yekuhwina menduru dzakawanda mumitambo yakasiyana yemuno pamwe neyekunze kwenyika nekudaro kukuvara kwake kwakambodzosera nyika kumashure mumutambo uyu.
Kubva paakakuvara, Sensei Mufundisi ange achishanda nesimba kuti agokwanisa kudzoka mumutambo uyu akwikwidze zvakare. “Rwendo rwekupora kwangu rwange rwakareba zvikuru asi ndinofara kuti gumbo rangu rapora manje ndinotarisira kuchitanga kukwikwidza.
“Chirongwa chekugadziridza gumbo rangu chakafamba zvakanaka uye izvezvi ndave kutoita gadziriro dzangu kuti panotanga gore idzva ndinge ndave kukwanisa kukwikwidza mumitambo yakasiyana.
Online Reporter