Online Reporter
Abel Ndooka
KUCHANGE kusingadanwe anonzwa kuRufaro Stadium muHarare nemusi weSvondo apo chikwata cheCAPS United chichasangana nevakomana vatsva vemuCastle Premier Soccer League veScottland FC mumutambo wePSL Match day two.
CAPS United kana kuti Make-kepe yakatanga nekuita mangange 1-1 neGreenfuel svondo radarika kunhandare yeGreenfuel Arena kuChisumbanje.
Kuchitiwo Scottland yakahwina mutambo wayo wekutanga wemuPSL apo yakakunda Triangle United.
CAPS United, iyo iri kurairidzwa naLloyd Chitembwe, ichange iri pamusha kuRufaro Stadium paichasangana nechikwata chaTonderai Ndiraya cheScottland FC kana kuti Mabvirabvira.
Mune mimwe mitambo iriko svondo rino, Herentals FC – iyo yakagara pamusoro pelogo parizvino – ichange iri pamusha kuRufaro Stadium musi weMugovera apo ichatatsurana neDynamos FC.
Mumutambo wayo wekutanga, Herentals FC yakakunda TelOne 2-1 kuRufaro Stadium svondo radarika, kuchiti Dynamos FC yakatanga nekuita mangange 0-0 neZPC Kariba kuRufaro Stadium zvekare nemusi weSvondo wadarika.
Shasha dzePSL – Simba Bhora – iri kunanga kuNyamhunga Stadium, kuKariba nemusi weMugovera uko ichanosangana neZPC Kariba.
Simba Bhora iri kudzokera kunhandare iyi uko yakapirwa mukombe wayo wePSL mwaka wadarika.
Highlanders FC ichange iri pamusha payo kuBabourfields Stadium kuBulawayo uko ichasangana neKwekwe United nemusi weSvondo.
Bosso yakatanga nekukundwa 1-0 nevakomana vatsva veMWOS FC mumutambo wakatambirwa kuBaobab Stadium kuMhondoro-Ngezi svondo radarika.
