daniel chigunwe
Kingstone Mapupu
MURIMI wechidiki wemuHarare anova nyanzvi yekugadzira madhamu madiki ekupfuira hove (fish ponds) uye achichengeta hove idzi zvekare, odzidzisa basa iri kune vezera rake nechinangwa chekuti vawane ruzivo rwemapfuirwo adzo.
Tinotenda Taundi (23) anoti anodzidzisa vechidiki pachena kupfuya hove nezvose zvinodiwa mubasa iri.
“Ndava nemakore anodarika maviri ndatanga chirongwa chekudzidzisa vechidiki kupfuya hove, rinova basa randakatangira kuMbare.
“Ndinosimudzira nhabvu yevechidiki zvekare kuMbare kuburikidza nechikwata chedu cheKuyamurana Youth Football Club. Ndakaona kuti vakawana ruzivo rwekupfuya hove zvinovaitira zvakanaka sezvo vanowana zvinovararamisa,” anodaro Taundi.
Anoti ari kuendawo kumaruwa nekunzvimbo dzemapurazi achidzidzisa vechidiki pamwechete nevechikuru nzira dzekupfuya nadzo hove.
“Tinotanga nekuvadzidzisa kugadzira mafish ponds akafara nemapfuyirwo ehove dzacho izvo zvinosanganisira maisirwo emvura nekukohwewa kwadzo. Tinovapawo ruzivo rwemhando dzehove dzinofambirana nematunhu avo uye pamusoro pezvo, tichivawanisa hove idzi zvekare,” anodaro Taundi.
Anoenderera mberi achiti: “Vechidiki vose kusvika kumakore makumi maviri okuberekwa, handibhadharise kuvapa zvidzidzo sezvo ndichida kuvapa hwaro hwekuvamba hupenyu.
“Ndinoita mazuva maviri ndichivadzidzisa padandemutande. Vanenge vapedza zvidzidzo, tinoita kuti vabatsirwe nevabereki vavo kuzotenga hove diki dzekupfuya idzo dzinotengeswa nevatinodyidzana navo. Panguva yekukohwa hove, dzinowanda zvichisiyana nemhando yacho nehuwandu hwemadzinopfuirwa sezvo tiine mafish ponds akasiyana ayo anosanganisira anenge akakura 5mx5m, 10mx10m, 20mx10m, 20×20 nemamwewo makuru kudarika apa. Tinokurudzira kuti madhamu edu ehove akomberedzwe neruzhowa kuitira kuti musawire zvimwe zvipfuyo nevana.”
Anoti mhando dzehove dzinonyanya kukurudzirwa kupfuya dzinosanganisira tilapia, catfish, tiger fish nema”breams”.Kudya kwehove kunowanikwa muzvitoro zvinotengesa chikafu chezvipfuyo uyewo varimi vanopfuya nguruve nehuku, madororo nendove yenguruve zvinoiswawo mumadhamu ehove kuti dzidye,” anodaro Taundi.
Online Reporter