Online Reporter
Kingstone Mapupu
ZVIMBOKOMA pakati pemakorokoza vachirwira sadza zvakazopera nekusuwa kukuru apo mumwe akabayiwa nebanga ndokufa kuShurugwi.
Mutauriri wemapurisa kudunhu reMidlands, Inspector Emmanuel Mahoko, vanotsinhira nyaya iyi.
“Tine nyaya inosuwisa yakaitika nemusi wa16 Chivabvu gore rino nenguva dza2300 hours, papurazi reDollar Farm kuShurugwi. Murume wemakore 19 okuberekwa akabaya mumwe wake nebanga rerudzi rweOkapi vachirwira sadza. Akafa ainzi Tanaka Sithole (26) wekwaSabhuku Musapingura kwaMambo Musikavanhu kuChipinge. Anonzi akabaiwa nebanga naNicholas Matanda (19) wekwaSabhuku Mazivise kwaMambo Nhema kuShurugwi nekuda kwegakava rekurwira sadza,” vanodaro Insp Mahoko.
Vanoti vaviri ava vaikorokoza goridhe pamugodhi wezvicherwa usisashandiswe kwakare kuShurugwi.
Vakazonetsana nekuda kwekugovana sadza ndokutanga kurwa. Hazvina kukwanisa kuzivikanwa kuti sadza iri raiva neusavi hwerudzii.
“Vaviri ava vakabika sadza, pakunopakura ndokutanga kugoverana. Mumwe akatora rakawanda panova pakamuka bongozozo, Matanda akabva aburitsa banga rerudzi rweOkapi ndokubaya naro Sithole muhapwa achibva atiza,” vanodaro Insp Mahoko.
Vanoti Sithole akabva atakurwa kuendeswa kuchipatara cheGweru Provincial Hospital uko akasvikofa mushure memazuva maviri nekuda kwemaronda ekuchekwa aya.
Mapurisa vakazokwanisa kusunga Matanda uyo anotarisirwa kupinda mudare reShurugwi Magistrates Court munguva pfupi iri kutevera nekuda kwemhosva yaari kupomerwa yekuponda.
“Nguva dzose, semapurisa, tinogara tichikurudzira vanhu kuti vagadzirise nyaya dzavo mune zvakanaka pasina kurwisana uyewo ikurudziro yedu kuti vanhu varemekedze upenyu hwevamwe,” vanodaro Insp Mahoko.
