admin
SVONDO rino Anna Stella Chipongo ari kwaMutare anotaura pamusoro pemabikirwo anoitwa nyaya yeshiri dzinonzi zvihuta.
MuZimbabwe, zvihuta zvagara zvichizivikanwa seshiri dzesango asi zvino dzave kupfuyiwa nevanhu dzichityiwa senyama nemazai. Nyama yacho zvose nemazai zvinonzi zvakanakira utano hwevanhu – varwere nevasingarware.
MAGADZIRIRO:
Chekutanga, fashaidza mvura wozouraya zvihuta nebanga sezvinongoitwa huku. Isa zvihuta mumvura inopisa kuti uzviundure makushe. Chizvigeza nemvura yakachena wozotumbura.
Unogona kutanga wazora nyama yako hupfu kuitira kudzinga kamunhuwi kehwema hweshiri idzi.
MABIKIRO:
Isa nyama yezvihuta mupoto ine mvura nemunyu zvinonzwirana wosiya zvichifashaira kusvika zvaibva. Kana mvura yapera, kanga nemafuta mashomanana kusvikira zvatsvukira wochizobura.
CHEKUDYISA:
Munogona kudya sechimukuyu kana kuisa supu padivi kuitira kuseva. Nyama yezvihuta inoperekedza sadza rezviyo, remhuka, mupunga kana rechibage zvekuti huya uone. Vamwe vanogona kudya nemupunga une dovi.
Online Reporter