adminSVONDO rino tine imwe nyaya yatinovimba kuti ichapa chidzidzo chikuru kuvarairidzi nevakuru vezvikoro.
Iyi inyaya yemumwe mudzidzisi wepachikoro cheMutasa Primary School chiri kuHighfield, muHarare, uyo akanzi nevakuru vezvedzidzo adzosere vabereki vose mari dzaainge apihwa dzevana vainge varongerwa kuti avaitise zvidzidzo zvepazororo kana kuti maextra-lessons.
Mudzidzisi uyu anonzi anofundisa vana veGrade 6 avo akabhadharisa mari yemaextra-lessons inosvika $15 pamumwe nemumwe wavo.
Mari iyi inonzi yakabhadharwa panguva yezororo rezvikoro rapera.
Zvichitevera kubuda kwakaita nyaya iyi muKwayedza apo vabereki vane vana vanodzidza pachikoro ichi vaigunun’una, zvakazoita kuti mukuru wezvedzidzo mudunhu iri, anove District Education Officer weHighglen, VaSolomon Mafukidze, vapindire.
Sekutaura kwaVaMafukidze, vanoti vakaenda pachikoro ichi ndokuona kuti zvechokwadi vabereki vevana ava vakange vadhadhariswa mari yemaextra-lessons zvinova zvisiri pamutemo.
Vanoti vakaita kuti mudzidzisi uyu adzosere vabereki vose mari dzavakange vadhabhara izvo akaita.
Tinowirirana zvikuru nedanho remukuru wezvedzidzo mudunhu reHighglen uyu, kuti kubhadharisa vabereki mari nenzira iyi kunokonzera huwori muzvikoro.
Zvakakoshawo, sekutaura kwaVaMafukidze, kuti vabereki vazive kuti maextra-lessons haaitwe nevana vanenge vasati vave kunyora bvunzo seveGrade 6.
Uye kune avo vanenge vave kunyora bvunzo dzeZimsec, vakadai seveGrade 7, maextra-lessons aya anoitwa bedzi kana vakuru vezvikoro vatenderana nevabereki, kwete kuvamanikidza.
Danho rakatorwa nemukuru wedzidzo uyu rinofanirwa kurumbidzwa zvikuru nekuti rakaita kuti vabereki varerukirwe.
Zvinorevaka kuti kana mubereki asina mari, mwana wake haakwanise kuita maextra-lessons aya uye anetenge asaririra muzvidzidzo zvake.
Mazuva ano mari iri kunetsa munyika nekudaro hazvisi nyore kuti vabereki vange vachiwana mari yekuti vana vavo vaite maextra-lessons.
Vamwe vari kukundikana kuwana mari yemafizi chaiwo kana yekutengera vana vavo mayunifomu zvichireva kuti vakazonzi vabhadhare imwe yemaextra-lessons unetenge watova mutoro chaiwo.
Pane dzimwe nguva bazi rezvedzidzo yepuraimari nesekondari rinotaura pamusoro pezvinhu zvakawanda zvinenge zvichiitwa muzvikoro richiti hazvisi pamutemo uye kuti hazvifanire kunge zvichiitwa asi pasina vanombozviteerera.
Muenzaniso ndewekuti zvikoro zveHurumende hazvitenderwe kudzinga vana vanenge vasina kubhadharirwa mari dzechikoro asi nguva dzakawanda vana vanongodzingwa pasina matanho anotorwa nebazi iri.
Ndokusaka tichiti tinorumbidza zvikuru danho rakatorwa nemukuru wedzidzo wekuHighglen uyu nekuti haana kungotaura bedzi asi kuti akaenda kuchikoro uku akanogadzirisa zvinhu zvakange zvichinetsa.
Ichi ngachive chidzidzo kune vamwe varairidzi nevakuru vezvikoro kuti huwori bodo.
Online Reporter