admin
SANGANO renhabvu reZimbabwe Football Association rinoti mapurisa anofanira kusunga vatsigiri venhabvu vanokonzeresa mhirizhonga kunhandare dzenyika dzakasiyana apo zvikwata zvavo zvinenge zvakundwa.
Izvi zvinotevera kufa kwakaita mumwe mutsigiri weHighlanders nguva diki yadarika mushure mekumuka kwemhirizhonga pakati pevamwe vatsigiri vechikwata ichi neveDynamos. Mumutambo uyu Dynamos yakahwina 1-0.
Zvakadai, Zifa inoti inoda kuona nhubu dzose dzinokonzeresa mhirizhonga kunhandare dzenhabvu dzichisungwa nekuti dziri kusvibisa mutambo uyu. Anoona nezvekufambiswa kwemashoko kuZifa, Xolisani Gwesela, anoti mapurisa ngavasunge nhubu idzi dzivharirwe mujeri. Gwesela anoti hazvitenderwe kupinda nemabhodhoro ehwahwa munhadhare dzenhabvu nekuti anogona kushandiswa zvisirizvo.
Anoti vatsigiri venhabvu vanofanirwa kutambira zvinenge zvabuda mumutambo kunyangwe chikwata chavo chahwina kana kukundwa.
“Nhabvu mutambo wekufara chete kwete zvemhirizhonga, isu tinoda kuona mhuri dzichiuya kuzofara pamwe chete dzichiona mutambo uyu.
“Zvinonyadzisa kuona vanhu vachitemana nemabhodhoro zvakadaro vachikuvadzana nekuti chikwata chavo chakundwa. Vatsigiri venhabvu ngavabvume kuti chikwata chavo chakundwa zvopfuura kwete kutemana nemabhodhoro, chaunenge wagona ipapo chii manje?
“Mapurisa tiri kuvakurudzira kuti vasunge nhubu idzi nekuti isu chatinoda kuona vanhu vachifara chete kunhandare dzenhabvu vachitsigira zvikwata zvavo.
“Chimwe chinhu, tinoda kuti vatsigiri venhabvu vapote vachisechwa pavanopinda munhandare kuzoona nhabvu nekuti vamwe vari kupinda nezvinokuvadza.
“Doro harifanirwe kupinda munhandare nekuti kana vamwe vanhu vadhakwa vane kahunhubu kavanenge vave kuita ako kanokonzeresa mhirizhonga,” akadaro Gwesela.
Online Reporter