adminMAPURISA echikamu chePolice Protection Unit (PPU) anoti akazvipira kushanda nesimba mukuchengetedza nyika pamwe nevakuru-vakuru veHurumende sezvinotarisirwa pasi pegwaro remashandiro avo, reClient Service Charter.Mashoko aya akataurwa muHarare svondo rapera naOfficer Commanding Police Protection Unit, Senior Assistant Commissioner Lee Muchemwa, apo vaiparura zviri pamutemo gwaro reClient Service Charter.
“Gwaro iri rinotsanangudza donzvo redu seZimbabwe Republic Police Protection Unit rinovapo pakuvandudza kuchengetedzwa kwemitemo, vakuru-vakuru veHurumende pamwe neveruzhinji. Tine tarisiro yekuti panosvika gore ra2020, tinenge tave padanho repamusoro mukuchengetedza mutemo sezvinotasirirwa pasi rose,” vanodaro.
Snr Ast Comm Muchemwa vanoti vanotenda zvikuru mapurisa ari pasi pechikamu chePPU nekuzvipira kwavari kuita mubasa ravo.
“Ndinoda kupa kutenda kumapurisa nekuda kwehushingi nehungwaru hwavo mukuchengetedza vakuru-vakuru veHurumende pamwe nevamiriri vedzimwe nyika. Ndinoti rambai makadaro mumakore anotevera,” vanodaro.
Vanoenderera mberi vachiti: “Tinovimbisa kuramba tichishanda nesimba nekuchengetedza mitemo pasina tsvete nekudzivirira kuparwa kwemhosva munyika. Pamusoro pezvo, ticharamba takazvininipisa nekutevedzera mitemo nguva dzose mukuita basa redu.”
Online Reporter