admin
Esau Hokonya ari kuGWERU
VARUME vaviri vakamiswa mudare redzimhosva reGweru Magistrates’ Courts vachipomerwa mhosva yekuba vachisandisa pfuti apo vanonzi vakapaza dzimba dzevanhu ndokuba midziyo inokosha $12 000. Killias Maphosa (45) anogara panhamba 122 Nkenyane Road, muGweru, naShadreck Ndlovu Chiduza (49) wepanhamba 50 Njube Road,kuBulawayo, vakatarisana nemhosva 14 dzekupaza dzimba vachiba midziyo.
Vavaviri ava vanonzi vakazosungwa mushure mekunge veruzhinji vavakwenyera kumapurisa.
Muchuchisi Langton Magara akaudza dare kuti nemusi wa 3 Chikumi gore rino, mapurisa echikamu cheCriminal Investigation Department kuBulawayo akasunga Shadreck nemhosva yekutiza mujeri reHarare Central Prison uko aipika makore gumi mushure mekubatwa nemhosva yekuba achishandisa pfuti.
Shadreck akazoendeswa kumaCID ekuGweru uko aidiwa zvakare nemhosva dzekupaza dzimba nekuba idzo anonzi akapara mugore ra2014.
Muchichisi Magara anoti Shadreck anonzi akambopara mhosva dzerudzi urwu nemwana wake —Johannes Chiduza — uyo ari kupika makore 29 kujeri reWha-Wha, kuGweru.
Mukuferefeta kwakaita mapurisa ekuGweru, Shadreck anonzi akazodura kuti akapara mhosva idzi naMaphosa zvakazoita kuti asungwewo. Pamidziyo inokosha $12 000 inonzi yakabiwa nevasungwa vaviri ava, mapurisa akakwanisa kuwana inokosha $11 000 inosanganisira materevhizheni, dzinhare, majenereta pamwe nepfuti yemhando ye303 rifle inonzi yaishandiswa mukupara mhosva idzi.
Mutongi Taengwa Chibanda akati vasungwa ava vadzoke zvakare kudare musi wa20 Chikumi apo vachange vachitongwa vachibva muchizarira.
Online Reporter