admin
Liberty Dube ari kwaMUTARE
MBAVHA yekubatwa ichiba mbudzi dzainge dziri mudanga apo yainge iri musvo kunze kwechipfeko chemukati nekavhesi bedzi yakatongerwa kugara mujeri kwemwedzi misere nedare reMutare Magistrate Court.
Mutongi wedare iri, Prisca Manhibi akabvisira Lovemore (37) wekuHobhouse, kwaMutare ikoko, mwedzi mitatu pachirango ichi paine chitsidzo chekuti haazopare imwe mhosva yerudzi urwu mukati memakore mashanu.
Mimwe mwedzi mishanu yainge yasara yakabviswa zvakare paine chitsidzo chekuti Lovemore anofanira kunofondoka kwemaawa 145 pasina mubhadharo panzvimbo yeScared Hearts iri kwekare kuHobhouse.
Muchuchusi Chris Munyuki anoudza dare kuti Philip Mukucha (50) uyo anogara paPlot 1 kuWeirmouth, kwaMutare, akange aine mbudzi dzake idzo dzaive dzakavharirwa mudanga.
Anoti Lovemore akaronga zano rekuba mbudzi idzi ndokupinda mudanga iri apo akakwira nepamusoro paro sezvo risina denga.
Mukucha akazonzwa mbudzi dzake dzongochema zvaisanzwisisike zvikaita kuti aende kudanga uku kunoongorora.
Ndipo paakasvikoita mahwekwe naLovemore ari mudanga rake rembudzi ari musvo apo ainge akangopfeka kachipfeko kemukati nekavhesi bedzi.
Lovemore paakaona Mukucha, akabva asvetuka achibva mudanga rembudzi, ndokusiya atema muridzi wembudzi nedombo paruoko rwake rwerudyi, achibva atiza – asina kupfeka kudaro.
Akatiza achisiya dzimwe mbatya dzake padanga apa izvo zvinosanganisira mudhebhe mitema miviri, nguwani nhema, masiripasi eblue nenhare yake.
Mukucha akatora zvinhu izvi ndokuenda nazvo kumapurisa musi wa5 Gumiguru izvo zvakazoita kuti Lovemore asungwe.
Zvinoratidza sekuti asati atanga kuba, Lovemore akatanga akatanura mbatya dzaiinge akapfeka, ndokuzopinda mudanga rembudzi oita mabasa akazomusungisa.
Online Reporter