Online Reporter
Abel Ndooka
MUIMBI weSungura – Vincent Dambamupfee – anoti mhanzi yakamuponesa zvikuru kubva kudoro sezvo hupenyu hwake hwainge hwasvika pakuparara.
Dambamupfee, uyo achangobura dambarefu rake rekutanga rinonzi ‘Gomo Ridonhe’, anoti pakambonetsa denda reCOVID-19 akange ave kuswera akagara asina zvekuita izvo zvakazomuona achipinda mune zvekungodhakwa.
Aona kuti hupenyu hwake hwave kukanganisika nekuda kwedoro uye kungodhakwa, Dambamupfee anoti akavamba chikwata chinonzi The Fat Liver Band ndokutanga kutsikisa mhanzi izvo zvakamuponesa zvakanyanya.
“Mhanzi yakandibatsira zvikuru muhupenyu hwangu, ndakange ndave munhu aingoswera achidhakwa nguva dzose panguva yelockdown yeCOVID-19 iya.
“Saka ndakazvionera kuti ndikaswera ndichiita zvekudhakwa hapana kwandinosvika muhupenyu, ndini ndinenge ndichingokanganisika. Saka ndakatora vakomana vandaiswera navo tichidhakwa, ndikati varume hapana kwatiri kuenda, ngatiite zvemhanzi tione kurarama, ndipo ndakabva ndaumba chikwata changu cheThe Fat Liver Band,” anodaro.
Dambamupfee anoyambira vechidiki achiti ngavasiye zvekudhakwa vatsvage zvimwe zvinovararamisa muhupenyu hwavo nekuti ndiyo yega nzira inoita kuti hupenyu hwavo hubudirire.
“Munoziva, hapana chinouya nekungodhakwa, ndinokurudzira vechidiki kuti ngavazvibate muhupenyu hwavo. vatsvage zvekuita zvinoita kuti vararame vashande nemaoko avo nekuti mukudhakwa hapana chitsvene chinouya,” anodaro.
Akatanga kuimba mugore ra2002 apo aiita zvekunyorera mhanzi vamwe vaimbi.
Dambarefu rake rekutanga raachangobva kubura rine nziyo nhanhatu dzinoti Keteni, Padoro Ipapo, Vabereki, Kuchengetwa, Gomo Ridonhe uye naNdikakudzaidza.
