Online Reporter
Chipo Mukorama
WANANO yemumwe murume nemudzimai wake yoda kuparara zvichitevera katsika kanonzi kari kuitwa nemukadzi uyu kekusanganisa chikafu chaanobika neweti pamwe nekuchengeta imwe weti mubhodhoro yakavigwa muwadhiropu yavo.
Izvi zvakabuda apo Artwell Matemera akazvuzvurudzira mudzimai wake, Winny Johannes, kudare reHarare Civil Court achiti ari kumushungurudza.
Matemera anoti Johannes akamushereketera kuburikidza nekumuisa rukaho.
Nekune rumwe rutivi, Johannes ari kupomerawo murume wake mhosva uyo anoti anounza shamwarikadzi kumba kwavo izvo zvinoita kuti agumisire ava kushaya zvipfeko zvake zvemukati zvakati wandei.
Matemera anoti mudzimai wake akatanga kusanganisa weti nechikafu mushure mekumufungira kuti ainge asina kuvimbika.
“Ini ndinoshanda kuBindura uye mudzimai wangu anogara muno muHarare, takatanga kunetsana mushure mekunge ndamubata achiita gumbo mumba gumbo panze.
“Akatanga kuita zvisinganzwisisike, achiisa weti muchikafu ndikazoona kuti ari kusanganisa weti nemumwe mushonga wakaita kunge hupfu wandisingazive.”
Matemera akaratidza dare bhodhoro raanoti raive neweti yakasanganiswa nemumwe mushonga.
“Pandakamubvunza nezvemabhodhoro andakaona muwadhiropu yedu, akatanga kundituka achiti ndizvo zvinoitika kana usina mari.
“Akandityisidzira achiti anoda kundibaya nebanga ndikamurwisa ndikachekwa paruoko,” anodaro.
“Pose patinosasana pabonde, anomwaya mushonga wandisingazive pamuviri wangu, anondirovawo nekundirambidza kuona vana vangu.”
Johannes akapomera Matemera mhosva yekumushungurudza nekuunza shamwarikadzi dzake mumba mavo.
“Hongu, bhodhoro nderangu, asi ndinorishandisa kuchengeta mishonga sezvo ndichitengesa mishonga.
“Akandisiya ndiine pamuviri pemapatya, ndakarwisana naye nekuda kwetsika yake yekunditorera zvipfeko zvangu zvemukati achipa shamwarikadzi dzake.
“Akaudzawo vanhu vemunharaunda medu kuti ndakamutapurira njovhera,” anodaro.
Mutongi Meenal Narotam vakakurudzira vaviri ava kuti vatsvage chipangamazano anovabatsira ndokuzopa Matemera gwaro redziviriro.
