Online Reporter
Mthabisi Tshuma
MUMWE mupurisa anonzi akarova murume waakange asungira mhosva yekuba kusvika afa uye ndokuzama kuvigiridza nyaya iyi nekudimbura-dimbura mutumbi wacho ndokuukanda muchimbuzi (blair toilet)
Nyaya iyi yakaitika mumusha weMalalume kuBulilima.
Constable Blessed Moyo, uyo anoshanda paMalalume Police Base, ari kutarisana nemhosva yehumhondi mushure mekunge mutumbi wemurume waakasunga pakutanga kwegore rino wawanikwa wakavigwa muchimbuzi.
Chimbuzi ichi chiri kuseri kwekiriniki iyo inogarawo mapurisa.
Vagari vemumusha uyu vanoti Const Moyo
akabatana nevamwe vemunzvimbo iyi kuti vaedze kuvigiridza mhosva iyi.
Asi nyaya iyi yakazobuda pachena apo dehenya nemapfupa zvakawanikwa pamwe chete nengetani dzemapurisa, banga reOkapi rine ropa uye hembe dzakabvaruka.
“Taivimba naye kuti achatidzivirira asi ndiye dhiyabhorosi aiva pakati pedu,” anodaro mumwe mutengesi wepaTjaguta Business Centre.
“Akashandisa simba zvisizvo, akatishungurudza nekuda kwedoro, zvino chii ichi? Anofanira kuworera mujeri.”
Sekutaura kuri kuita vamwe vanyeveri vanove mapurisa, nyaya iyi yakatanga kumavambo aKukadzi apo mugari wemumusha uyu, Melisa Ndlovu, akawanikidza mumwe murume achiba chikafu nembatya pamba pake.
Murume uyu akatiza asi akazosungwa naConst Moyo.
Akasungwa maoko ndokuunzwa kukamba yemapurisa uko Melisa nevamwe vake vatatu vakamuziva kuti ndiye ainge akamubira.
Vakaona zvichiitika vanoti murume uyu, uyo aizviti anobva kuBinga uye achiita seasina kugadzikana mupfungwa, akarohwa zvakaipisisa naConst Moyo achishandisa shamhu yemuti wemupani, chamboko, mugoti nemubato wepiki wepurasitiki kusvika areurura kuti ndiye mbavha.
“Akakumbira mvura uye akati ainzwa dzungu,” anodaro mumwe mupurisa. “Vakazodzokera kukamba yemapurisa uko Constable Moyo vakataurira vanhu vaivepo kuti vaende zvavo vachiti vaizoronga zvifambiso kuenda kuBulawayo, murume uyu haana kuzoonekwa ari mupenyu zvakare.”
Musi wa22 Chivabvu, dehenya nemapfupa zvakawanikwa zvakavigwa muchimbuzi kuseri kwekamba duku yemapurisa iyi.
Kutya kwakawedzera apo zvakaonekwa kuti aya akange ari mapfupa emurume akapedzisira kuonekwa ari mumaoko aConst Moyo.
Maporofita nen’anga vakashevedzwa nevagari vemunzvimbo iyi avo vanonzi vakaburitsa chokwadi chezvakaitika.
Const Moyo akasungwa uye ndokunyimwa mukana wekubvisa mari yebhero paakamiswa pamberi pedare rePlumtree Magistrate’s Court musi wa23 Chivabvu pamberi pemutongi VaMark Dzira.
Nyaya yake iri kuenderera mberi mudare iri.
Muchuchisi ndiVaArnold Mudekunye.
