Online Reporter
Abel Ndooka
MUIMBI ari kusimukira weurban grooves, Luxmore Chawira, uyo anonyanyozivikanwa saAlex Bl3nder, ari kukurudzira vechidiki kuti vakoshese rudo, achiti iyi ndiyo nzira yoga inokwanisa kuvavhurira mikana yakasiyana-siyana muupenyu, uye kuti vasiyane nezvinodhaka.
Achitaura nguva pfupi yadarika, Alex Bl3nder akati vechidiki vazhinji vari kurasika nokuti havasi kukoshesa rudo, zvinove zvimwe zviri kuvavharira mikana muupenyu hwavo.
Anoti rimwe dambudziko riri kudzorera vechidiki kumashure kutora zvinodhaka, naizvozvo ari kuvayambira kuti vasiyane nazvo, vazive Mwari, vokoshesa rudo.
“Muupenyu, zvakakosha kukoshesa chinhu chinonzi rudo. Hapana chatinoita kana pasina rudo. Ndosaka ini ndiri kuimba nziyo dzerudo, ndichikurudzira vechidiki kuti vakoshese rudo,” anodaro Alex Bl3nder.
“Tiri kuona vechidiki vemazuva ano vari kurasika nokuda kwekutora zvinodhaka zvisingatenderwi, izvo zviri kuita kuti varasike muupenyu hwavo.
“Ndinoti kune vechidiki, ibvai kune zvinodhaka. Raramai upenyu hwakachena uye muchitungamidza rudo.”
Alex Bl3nder kubva zvaatange kuita zvemimhanzi akwanisa kutsikisa madambarefu matatu. Nziyo dzake dzakaita mukurumbira dzinosanganisira “Parudo Rwedu Pachine Chimuko” uye “Dai Ndine Mapapiro”.
