admin
MUKURU wemapurisa eZimbabwe Republic Police, Commissioner-General Augustine Chihuri, svondo rino vakarumbidza mapurisa ari kuchengetedza runyararo kunyika dzakasiyana pasi pechirongwa cheUnited Nations Peacekeeping Mission nekushanda kwaari kuita nesimba izvo zviri kusimudzira mureza weZimbabwe.
Vachitaura muHarare apo vaichingamidza mapurisa 40 akadzoka kubva kuSouth Sudan, Comm-Gen Chihuri vakatenda mapurisa aya nekuzvipira mubasa ravo.
Zvakadaro, chimwe chikwata chemapurisa eZRP chinotarisirwa kusimuka muno chakananga kuSouth Sudan kunochengetedza runyararo munguva pfupi iri kutevera.
“Tinofara zvikuru kuti mapurisa edu akaenda akanoita mabasa atakavatuma zvine hunyanzvi zvinova zvakasimudza mureza wenyika ino. Hamuna kungova vashanyi vanoenda kunoona dzimwe nyika bedzi. Kunyika dzatinokuendesai kune mamiriro ekunze akasiyana nekuno pamwe nemarudzi, tsika nemagariro, mitauro yakasiyana, hondo nezvimwe zvinorwadza. Asi imi makashinga mukanogarako kwegore rose vamwe vakadzoka vakwiridzirwa zvigaro zvavo zvebasa,” vanodaro.
Comm-Gen Chihuri vanoti mapurisa achasunga vose vachabatwa vachiita mhirizhonga, kusanganisira yemudzimba.
Vanoti mhirizhonga inokanganisa budiriro yenyika pamwe nekukonzera kusagadzikana mumagariro everuzhinji.
Online Reporter