Online Reporter
Abel Ndooka
MUMWE muporofita wemuHarare, akabatana nevaimbi veZimdancehall vane chitsama, ari kurwisa kutorwa kwezvinodhaka, izvo zviri kukanganisa vechidiki vakasiyana-siyana.
Prophet Kudakwashe Jose, veVictorius Family Church International, svondo rino vakaparura chirongwa chavo “Say No to Drugs, Say YES to Jesus”, icho chakanangana nekurwisa kutorwa kwezvinodhaka, uko kunokuvadza muviri nepfungwa.
Vachitaura muHarare pakuparurwa kwechirongwa ichi, apo paive nemapuromota emhanzi ane mukurumbira anosanganisira Partson “Chipaz” Chimbodza, Godfather Templeman naDJ Fantan, Prophet Jose vakati vakafunga zvekuvamba chirongwa ichi nedonzvo rekurwisa denda ranetsa rekutorwa kwezvinodhaka.
“Zvinodhaka zvaparadza vechidiki vakasiyana-siyana uye zvinorwadza kuona kuparara kuri kuita vana vakawanda nokuda kwezvinodhaka.
“Ndakatora danho rokuti ndibatane nevaimbi veZimdancehall nokuti vanoteverwa nevechidiki vakawanda kuti tigotaura nezwi rimwe chete kuti ngatisiye zvinodhaka; zvinodhaka hazvina zvazvinotipa.
“Tine zvimwe zvirongwa zvakawanda zvatiri kuita maringe nekurwisa zvinodhaka uye kusimudzira vechidiki,” vakadaro.
Zvakadaro, Prophet Jose vakati vari kuzadzikisa chivimbiso chavo chavakapa chokupa masitendi maviri kuDonnybrook kuvaimbi vanoti Mogo Vibes naLady D, avo vakahwinha pamutambo we2025 Harare Cup Clash.
