Online Reporter
Latwell Nyangu naPriscilla Zengeni
MUDZIMAI wekuGokwe akatongerwa kugara mujeri kwemakore maviri mushure mekubatwa nemhosva inokatyamadza yekukweva ropa kubva kumwana wechikoro ane makore 10 okuberekwa achishandisa tsono.
Akabva aisa ropa racho pamuchina unovheneka HIV.
Mudzimai uyu, Mavis Sibanda, akasungwa neMuvhuro.
Akamiswa mudare reGokwe Magistrates Court ndokubatwa nemhosva yekukanganisira mwana uyu.
Sibanda, uyo anoita basa rekutengesa pamusika, akakumbira dare kuti anzwirwe tsitsi achiudza mutongi kuti ane vana vaanochengeta.
Sibanda achapedza makore maviri achidya refovhoro.
Nyaya iyi, iyo yaita kuti asungwe, yakaitika mangwanani emusi weMuvhuro pedyo neSai Mart Supermarket muGokwe CBD.
Akadaidza mwana weGrade 5 pamusika wake achibva akumbira chigunwe chake chekurudyi ndokumubaya netsono inotora ropa, iro akaisa pamuchina unoongorora HIV.
Mwana uyu akataura nyaya iyi kuvarume vaviri vaakasangana navo munzira avo vakaenda naye kumba kwevabereki vake ndokunoudza baba vake.
Nyaya iyi yakazomhan’arwa kumapurisa izvo zvakaona Sibanda achisungwa.
