admin
MURIWO wetsunga une dovi wakakosha zvikuru kuutano hwevanhu sezvo uine maVitamin A neC uye iron izvo zvinobatsira mukusimbisa mabhonzo nekuwedzera ropa mumuviri.
Svondo rino Talent Maurede wekuGoromonzi anotsanangura mamwe mabikirwo emuriwo uyu zvemandorokwati.
Zvinodiwa:
Chikari, chipunu, munyu, muriwo wetsunga, matomatisi, mafuta nedovi
Mabikiro:
Geza hanyanisi nematomatisi wocheka muzvidimbu zvidiki.
Geza muriwo wouchekerera.
Gadza chikari pamoto woisa muriwo.
Kanda munyu wakaringana netumafuta tushoma.
Siya zvikwate kwemaminitsi gumi wozokanda hanyanisi nematomatisi zvawacheka.
Isa dovi zvipunu zviviri woramba uchikurunga kusvika zvave kukwata segwata-gwata.
Munogona kudya nesadza remhunga, rezviyo kana rechibage uye uku kudya kwechivanhu kunovaka muviri.
Sunungukai kutumira zvamunoda kuti zvibude pachirongwa chino panhamba dzinoti +263 713 411 281.
Online Reporter