Online Reporter
Muchaneta Chimuka
MURUME wekwaMutoko akarasikirwa nehupenyu mushure mekurumwa uye kudyiwa nebere achibva kubhawa uko akanga ari kunwa doro.
Mutauriri wemapurisa mudunhu reMashonaland East Province, Inspector Simon Chazovachiyi, vanoti tsekwende iyi yakaitika nomusi wa30 Nyamavhuvhu munguva dzemanheru apo Tendai Pasi (53) aibva kuKatsukunya Township kwaMutoko kunonwa doro.
“Pazuva iri, zuva rorereka, ave mufi uyu akaonekwa naAnnah Matematema (33) pamwe nemurume wake Robert Robert Mvembe (41) vekuPisirai Village kwaMambo Mutoko akagara pasi achiratidzika kuva munhu akadhakwa zvikuru vachibva vaudza mudzimai wake, Ashely Kachidza (48). Muzuva rakatevera mangwanani, Ashely Kachidza nemwanakomana wake Christ Pasi (13) vakaona kuti Tendai Pasi akanga asina kudzoka kumba vachibva vaita tevedzo,” vanodaro.
Panguva iyo vaviri ava vakanga vari mushishi kutsvaka baba ava, vakabva vasangana neimwe yeshangu yavo parutivi rwemugwagwa vachibva vaona muhwezva wekudhonzwa kwavakaitwa nebere uye ropa rakazara pamahuswa. Vakaramba vachironda vachibva vazoona mutumbi waTendai Pasi uri pachinhambwe chemamita gumi kubva pamugwagwa apo akapedzisira kuonekwa akagara.
Vakazozivisa mapurisa eZRP Mutoko avo vakaendako nematikitiva eCriminal Investigations Department vanova vakasvikowana mutumbi wake wakadyiwa-dyiwa maoko uye dumbu rake rakabvarurwa.
“Matsimba ebere akaonekwa akakomberedza nharaunda yakaitikira mashura aya uye dzimwe nhengo dzemuviri dzemufi dzainge dzakadyiwa dzinosanganisira mapfudzi, ruoko rwekuruboshwe nepadumbu zvinova zvinopa mucherechedzo wekuti anogona kudaro akadyiwa nemhuka dzesango,” vanodaro.
Inspector Chazovachii vanoti mutumbi uyu wakazoendeswa kumochari yechipatara cheMutoko Hospital kunovhenekwa nemachiremba.
“Vashandi veZimbabwe Parks & Wildlife Management Authority vakaziviswa vakauya kuzoita tsvakurudzo dzavo dzakabudisa kuti ainge aurayiwa nemhuka dzesango nokudaro hapana imwe fungidziro iripo yatingati murume uyu anogona kunge akapondwa,” vanodaro.
