Murume azviuraya nemadharameta

MURUME wekuMbizo kuKwekwe akazviuraya nekuzviputitsira madharameta nekuda kwechikonzero chisina kukwanisa kuzivikanwa.

Mutauriri wemapurisa kudunhu reMidlands, Inspector Emmanuel Mahoko, vanoti nyaya iyi yakaitika nemusi wa18 Kubvumbi nenguva dza12 masikati pamba pemuchakabvu uyu kuMbizo.

“Murume akawanikwa akafa uyu anonzi Talent Runi (25) uye nemusi uyu, Tinotenda Tsvangira (23) anova munin’ina waRuni anoti vakabva vose kumusha kuGokwe ndokusvika mudhorobha reKwekwe vachibva vasiyana Runi ndokuenda kumba woga,” vanodaro Insp Mahoko.

Vanoti nenguva dza16:24 pm, Tsvangira akazoridzirwa nhare natete vake kubva kuHarare  vachimutaurira kuti aende kumba kunotarisa sezvo vaiti Runi aiva avimbisa kuti aida kuzviuraya.

“Tsvangira akabva amhanya kumba sezvo vaigara vose apo akasvika ndokuwana madhoo ose epamba apa akakiiwa nemukati. Akabva apinda mumba nepahwindo ndokuwana Runi akatofa kare mutumbi wake uri pamubhedha, ndokuenda kunomhan’ara nyaya iyi kumapurisa ekuMbizo ZRP,” vanodaro Insp Mahoko.

Vanoti mukuferefetwa kwenyaya iyi, zvakaonekwa kuti mutumbi uyu mazino aiva akadzurwa nechinhu chine simba akamwararika mukati memba makazara ropa pasi nemumadziro.

“Uyewo mumba umu makaonekwa zvinoputika zvaiva zvashandiswa nezvimwewo zvaiva zvisina kushandiswa, maivawo netambo dzinoshandiswa nezvinoputika kana kuti ma’dynamites’. Mabhokisi emachisi aiva akazara pahuriri nemumba mose,” vanodaro Insp Mahoko.

Vanoti zvakazobuda pachena kuti murume uyu akazviuraya achishandisa madharameta anoshandiswa pakuputitsa matombo.

“Senguva dzose, tinokurudzira vanhu kuti kana vaine zvinovanetsa ngavatsvage vekutaura navo vakaita semapurisa, mafundisi, masabhuku,  madzishe nevamwe vakuru munzvimbo votaura matambudziko avo pane kuzviuraya nekuti kufa hakuna chakunogadzirisa kunze kwekusiira mhuri matambudziko,” vanodaro Insp Mahoko.

PIX: Akazviuraya nekuzviputitsira zvombo-25/04/25