Online Reporter
Tendai Gukutikwa
MUDZIMAI ane makore 61 okuberekwa wemumusha weRegayivadero kwaTanda kuMayo kwaMambo Makoni, kudunhu reManicaland akapondwa munyaya inofungidzirwa kuti ine chekuita nekunetsana mumhuri apo mumwe wevanakomana vake anonzi ndiye akapara mhosva iyi.
Zvakamutsa gakava rakazourayisa Mai Rosemary Mapasvikwa hazvisati zvazivikanwa.
Tafirenyika Musuwa (31) ndiye ari kunzi akapara mhosva iyi achibva atiza nokudaro mapurisa ari mushishi kumutsvaka.
Mutauriri wemapurisa mudunhu reManicaland, Assistant Inspector Wiseman Chinyoka, vanotsinhira nyaya iyi vachiti mutumbi wemudzimai uyu wakawanikwa uri mudivi reropa uye uine ronda rakadzika kugotsi.
“Nyaya iyi yakaitika nomusi wa23 Kubvumbi apo mumwe mwanakomana wemushakabvu, Simon Musuwa (29), uyo anogara pamusha mumwechete uyu anoti akafumoenda kunorima mumunda wemhuri iyi. Panguva iyi, amai vake vainge vakarara muimba yavo yekurara, Tafirenyika akamira pachivanze.
“Simon paakadzoka kumba nenguva dza9 mangwanani kuti anosunungura mombe dzake, akasangana nechiitiko chinotyisa apo amai vake vakanga vakarara paruware rwaiva mamita mashoma kubva pamba apa, Tafirenyika akagara pedyo.
“Paakangorora amai vake, Simon akaona kuti vaive neronda guru kugotsi uye vakarara vakatarisa pasi mudivi reropa,” vanodaro Asst Insp Chinyoka.
Mapurisa eZRP Mayo neCID Rusape vakabva vamhanyira panzvimbo iyi.
Mutumbi uyu wakaendeswa kumochari yeRusape General Hospital kunoongororwa nanachiremba.
Asst Insp Chinyoka vanoti demo raiva neropa rinofungidzirwa kuti ndiro rakashandiswa pakurwisa mudzimai uyu rakaonekwa mamita mashanu kubva paiva nemutumbi wake rakaiswa pamusoro pehuni.
Matikitivha akaona zvekare matsimba eshangu dzaTafirenyika panzvimbo iyi.
“Simon akabva azivisa muvakidzani wake uyo akamhan’ara kumapurisa asi Tafirenyika akanga atotiza kare,” vanodaro Ass Insp Chinyoka.
“Tiri kukumbira kuna ani zvake ane ruzivo rwunogona kuita kuti munhu ari kufungidzirwa kuti akapara mhosva iyi asungwe vamhan’are kukamba yemapurisa iri pedyo navo. Veruzhinji vanoyambirwa kuti vasaende pedyo naye asi kuti vazivise mapurisa nekukasika sezvo ari munhu anotyisa zvikuru.”
