—Mutupo—Moyondizvo

Evoyi Moyondizvo

Bvumavaranda,

Vakadzi vaChiza vomene

Dhehwa rangu,

Vakami vomukaka,

Sahi Mhondoro,

Vene vavanhu,

Moyondizvo,

VaChuruchamapfunde, manji

VaChirisamhuru,

Muzinda wen’ombe,

VokwaChumachamambo,

Chamachira chinosakara

Mupfudze waNyan’ombe,

Chiwanzamukaka VaMubvumira,

VaDzimbahwe,

Vano muti unobva Njaira,

Uchirasira mhaswa matehwe,

VokwaGotakota,

Zinwanenyanga,

Vasingaringwi usu, jengetanyika,

VaChaona mudondo vagadzi voushe,

Vokusamba mukaka,

Kusamba mvura ina madzongwe,

Vari Manyanga,

Vano mudzi unobva Mabvazuva.

Uchindobaya Rupango,

Vakapera nenda muDzimbahwe,

Chipauro chamafuta,

VaChisiyandanyara,

VaMupfudzewadikitiki,

Vari urozvi Nhandare

Kuno muti unokope Chirimo,

Zhizha uchikope ndove,

Mururamunhanga,

Vesviromo svitokotoko,

Svine nzungu inosvitsa dakataka muchidoma,

Vorupazho rupwetepwete runonama imba,

Vezvikwechekweche navavindukira,

Asina kuvindukira anowana zvaenda nomwando,

Dyembeu kurima kwakona mutengeni

Wazvozvovenga,

Mambo usitandavari,

Kutandavara mvura inova mubvumbi,

Vedhombo rakakona chimwango namarangadya,

VaMatururamvura zienda vachisiya,

Nyamutora zvose, nyama tinodya,

Mafuta tinozora.

Mukaka tinomwa nokusevesa sadza

Dehwe tinowarira,

Nyanga igonan’ombe

Ndove tinodzurisa mumba,

Muswe ndewenhawo.

Gorekotera chiri mudanga,

Ndambachirashwa.

Hekani Nhandare mupfudze uri mudanga,

Haiwa tatenda varidzi wenyika

Zvaitwa Sahi,

Muzinda wapasi, Changamire.

A C Hodza (Department of African Languages)