Online Reporter
Muchaneta Chimuka
MUTYAIRI wekombi anogara mubhuku rekwaChitsvatsva, kwaSeke wekupinda nemwenje mudziva apo anonzi akarikita mupurisa nezvibhakera mushure mekutsiurwa kuti abude mumugwagwa umo ainge akapaka kombi yake nenzira isina kunaka, akazvuzvurudzirwa kudare redzimhosva.
Walter Mucharega (28) akamiswa pamberi pemutongi wedare reChitungwiza Magistrate’s Court, VaDennis Mangosi, nemhosva yekurova munhu.
Ari kutongwa pasi pechikamu chemutemo weSection 89 of the Code (Assault).
Mucharega ari kutarisirwa kudzoka kudare munguva pfupi iri kutevera apo pari kuda kuonekwa kuti angawaniswa bhero here kana kuti kwete.
Muchuchisi Shamiso Mwapangira vakaudza dare kuti nomusi wa2 Chivabvu gore rino, mumhan’ari Aaron Muyedzanga (45) wepanhamba 21211 Unit J kuChitungwiza, uyo anoshanda saPolice Detective kuCID Chitungwiza, akange achityaira motokari yemapurisa yemhando yeProbox ine nhamba dzinoti ZRP444T mumugwagwa Seke akananga kwaZiko.
Detective Muyedzanga vaive nemamwe mapurisa anoti Detective Sergeant Manyandure, Mutasa naDetective Constable Chaka uye vasungwa vaviri vanoti Persistance Mago naHazvinei Mapfika panguva iyo Mucharega akatanga kuvavharira mugwagwa.
Izvi zvakaitika vari padyo negedhi repadzimba dzinogara mapurisa paZRP New Camp kuChitungwiza kwekare.
Mucharega akatsiurwa nezvehunhu hwake hwakashata mumugwagwa naDetective Mayezanga avo vakamutaurira kuti abude mumugwagwa asi akabva atotanga kuvarova nechibhakera kaviri kumeso.
Detective Manyangire ndivo vakazodzika mumotokari vave kurandutsira botso iri.
Detective Mayedzanga havana kukukuvara zvinoonekwa pakurohwa uku asi vanoti vakangosara vaine marwadzo.
Online Reporter