Mvura zhinji yotarisirwa kunaya: MSD

Mvura zhinji ine mupande yotarisirwa kunaya

Munyori weKwayedza

MVURA zhinji ine mabhanan’ana iri kutarisirwa kunaya kumatunhu akawanda muZimbabwe kutanga nemusi weChitatu chino kusvika mukupera kwesvondo.

Kunyangwe zvazvo kunaya kwemvura kuchigamuchirwa nemufaro, bazi rinoona nezvemamiriro ekunze, reMeteorological Services Department (MSD) rinokurudzira veruzhinji kuti vatore matanho ekuzvichengetedza.

MSD inoti mvura yakawanda iri kutarisirwa kunaya mumatunhu matatu eMashonaland, Harare Metropolitan, Matabeleland North, kuchamhembe kweMidlands neManicaland.

Kusiyana neizvi, kumatunhu anoti Bulawayo Metropolitan, Matabeleland South, Masvingo nekumaodzanyemba kweMidlands kunotarisirwa kunge kuine makore, kuchipisa uye paine mukana wekunaya kwemvura ine mabhanan’ana nekufamba kwenguva.

Veruzhinji vanokurudzirwa kuti vatsvage pekuhwanda pakanaka kana mvura ichinaya iine mabhanan’ana uye kuti vasayambuka nzizi dzakazara nemazambuko akadzikira.

Nemusi weMuvhuro uno, mvura zhinji yakanaya kunzvimbo dzinosanganisira Chipinge uko yakadzika pasi zvekusvika 37mm, ichiteverwa neLupane (36mm) uye Makoholi (33mm).

Dzimwe nzvimbo dzakanaya mvura yakawanda dzakadai seChisengu (30mm) nekuWest Nicholson (27mm).